Inuusuttoq Siumumeersoq tunuarpoq
Inuusuttoq ilisarisimaneqarpianngitsoq Siumumeersoq, Inuutersuaq-Ulloriaq Løvstrøm 32-inik ukiulik Avannaata Kommunianiit tunuarniarluni aalajangerpoq.
Inuutersuaq-Ulloriaq Løvstrøm 128-inik taaguunneqarluni kommunalbestyrelsitaassamut qinerneqarpoq. Politikkimi suliniuteqarniarluni 2016-imi aalajangerpoq, 2017-imilu aamma kommunimut qineqqusaaqaarluni, taamanili qinerneqanngilaq.
Maanna qinigaagaluarluni tunuarniuteqarnissaminut aalajangerpoq, panini ernini aapparisanilu salliuttariaqarsorigamigit.
- Soorunami aalajangerniarneq imaannaanngilaq, Sermitsiaq.AG-imut oqarpoq.
Avannaata Kommuniani kommunalbestyrelsit suli inissititerneqanngikkaluartut Inuutersuup paniata nukarliup ersinngitsumik innarluutillip ataatami peqanngikulanera malugisimavaa.
- Ilaqutariittut qinigassanngortikkama piareersarnikuuvugut. Ukiuni sisamani politikkilerinissaq piareersarlugu. Kisiannili sapaatip akunnerata siuliani panipput sakkortuumik peqanngikulanera qisuariarfigivaa. Tassanngaanniit aapparalu ullormiit ullormut oqaloqatigiittarnitsinni suna pitsaanerunersoq eqqartorparput. Kommunalbestyrelsimiit tunuarniarlunga ippassaq aalajangerpunga, Inuutersuaq-Ulloriaq Løvstrøm oqaluttuarpoq.
Ajornartorsiutit suli eqqartortuarniarpai
Avannaata Kommuniani sumiiffinni assigiinngitsuni politikeri inuusuttoq taaguunneqarpoq. Angerlarsimaffinni qimannginneruniassagamiuk Facebook aqqutigalugu qineqqusaarpoq. Qineqqusaarnermini innarluutillit atugarisaat pitsanngorsarniarlugit kommunimilu illoqarfinni nunaqarfinnilu tamani ineriartortitsisoqarnissaa suliniutiginiarlugit neriorsuutigalugu.
- Nipangersimaannartuunngilanga. Suli ajornartorsiutit uparuartugassat maalaarutissallu sulissutigineqartarnissaat nipituuliutigisassavakka, Inuutersuaq-Ulloriaq Løvstrøm oqarpoq.
Taanna 32-nnarnik ukioqaraluarluni Uummannami Siumut immikkoortortaqarfiani siulittaasumut tullersortaavoq. Tassanilu inissisimaniarallarpoq ukiup ingerlanerani ataatsimeersuartoqarnissaata tungaanut.
Inuutersuaq-Ulloriaq Løvstrøm marlunnik paneqarpoq ataatsimillu erneqarluni. Pania nukarleq ersinngitsumik innarluuteqarpoq, innarluutaalu Nunatsinni katsersorneqarsinnaanani.