Skip to main content

Inuusuttoq silap pissusianik illersuinissamut kajumissusilik qinigassanngortinneqartoq

Sascha Blidorf, Nuummi GU-mi atuartoq, Demokraatit Folketingimut sassartitaasa sisamarissavaat kingullersaralugulu.

Demokraatit siulittaasorigallagaata Folketingimut qinersinermut atatillugu sassartitassatta kingullersaat arnaq inuusuttoq saqqummiukkamiuk nuannaarutigaa.

- Isertussanngilarput Sascha piffissami sivisuumi piukkussimagatsigu. Sunut tamanut attukkaminut tunniusimasuuvoq, pikkorilluinnartuuvoq Demokraatinilu piginnaasai atorluarusoqaagut. Aamma kikkut tamarmik Kalaallit Nunaanni najugallit nuannaartorisariaqaraluarpaat. Sascha sassartitatsinnut ilanngummat tikilluaqqungaarpara, Randi Vestergaard Evaldsen tusagassiuutinut nalunaarummi oqarpoq.

Silap pissusia pillugu akerliussutsimik takutitsisoq

Partiip ilisimatitsissutigaa, Sascha Blidorf inuppassuarnik ilisarisimaneqalerpoq atuaqamminut siuttuulluni silaannaap pissusaa illersorumallugu Nuummi marsi qiteqquttoq akerliussutsimik takutitseqataagami. 

Sascha aamma Danmarkimiit uteqqammerpoq ilaatigut Folketingimi danskit politikeriinut erseqqissaassutigereerlugu nunatsinni silaannaap pissusaata allanngoriartorneranit qanoq ulorianartorsiortinneqartigisugut.

- Allatulli nunarsuup sinnerani inuusuttorpassuartut quarsaarutigaara, politikerit allallu silaannaap pissusaanik ulorianartorsiortitaalinnginnissarput akiorniarlugu taamma iliuusikitsigisimammata. Nunarsuup qanoq ittup qitornatsinnut tunniunnissaa eqqarsaatigalugu uanga kinguaariinnut ernumalluinnartunut ilaavunga. Isumaqarpunga maannakkut politikerigut nuimasut ilaginnaasimasut aamma isumaqarpunga, allarluinnarmik periuseqarluta ingerlaqqittariaqartugut silaannaallu pissusaa pingaarnerpaatut inissillugu oqallisigisariaqaleripput. Uanga tassani suleqataarusuppunga aamma qineqqusaarnermi qularnaarusuppara mingutsitsinnginnerulluta pilernissatta nipangiutiinnarneqannginnissaa. Tamanna pingaartorujussuuvoq, Sascha Blidorf oqarpoq,  taanna qilanaarpoq Demokraatit folketingimut sassartitaannik allanik qineqqusaaqateqarnissaminut.

Sascha Blidorfip saniatigut  Nivi Olsen, Steen Lynge aamma Jens-Christian Jacobsen Demokraatit sinnerlugit folketingimut qinigassanngortipput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER