Inuusuttoq innarluutilik ilinniagaqarniarnermini tapiiffigineqarsinnaanngitsoq

Kaaleeraq M. Andersen innarluuteqaraluarluni gigteqaraluarlunilu ilinniagaqarusuppoq. Taamaammat Ilisimatusarfimmi tusagassiuinermik ilinniagaqarnissamik qinnuteqarsimavoq akuerisaasimallunilu.

- Siusinaartumik utoqqalinersiutinik pisartagaqaannarnanga inuiaqatigiinnut ikioqataarusuppunga.

Ajornartorsiuteqarporlu. Taanna ilinniagaqassanguni ikiuutinik tapiissutinillu ilinniarnermut atugassaminik pisariaqartitsivoq.

- Siullermik Ilisimatusarfimmut saaffiginnippunga, ilisimatinneqarpungali ikiorserneqarsinnaananga.

Danmarkimi Institutet for Blind og Svagsynede (IBOS)-imi attaveqarfini aqqutigalugu Kaaleeraq M. Andersenip 'special pædagogisk støtte' ilisimavaa. Aaqqiissut taanna atorlugu isigiarsuttut tappiitsut isigiarsuttullu atuakkanik atorniartarfianni ilaatigut atuakkanik immiussanik atorniarsinnaasarput. Taamaammat tassunga assigusumik Kalaallit Nunaanni aaqqiissuteqarnersoq Ilinniartitaanermut Naalakkersuisoqarfimmut paasiniarsimavaa.

Akissutigineqartorli tusarluarnarsimanngilaq, tassungami assingusumik ilinniagaqarnersiutinik ikiorsiissuteqanngilaq.

- Innarluuteqarluni ilinniartuugaanni puigugaasutut misigisimanartarpoq, Kaaleeraq M. Andersen oqarpoq.

Ilinniagaqarnissamut pisinnaatitaaffik

Tilioq-mi aningaasanik sipaaruteqarneq pissutigalugu ilinniartitaaneq suli misissuiffigineqarsimanngimmat Innarluutillit Illersuisuata Christina Johnsenip ajornartorsiut erseqqissumik ilisimasaqarfiginngilaa. Oqaaseqarfigerusuppaalu.

- Naalagaaffiit Peqatigiit isumaqatigiissutaanni erseqqissarneqarpoq, innarluutillit ilinniagaqarnissamik pisinnaatitaaffeqartut. Taamaammat innarluutillit inissaqartinniarlugit ilinniartitseriaaseq tulluarsarneqassaaq, Christina Johnsen Sermitsiaq.AG-mut oqarpoq.

Taassuma oqaluttuaraa, ilinniagaqarnissamik pisinnaatitaaffik siunissami Tilioq-mit suliniutigineqassasoq.

- Ilinniartitaaneq Tilioq-mit ukkatarineqartussat ilagaat. Innarluutillit ilinniagaqarniarunik suut periarfissarineraat misissussavarput.

Kaaleeraq M. Andersen aningaasanik ikiorsiissutit kommunimut qinnutigisinnaavai.

- Soorunami taamaaliussaanga, ilinniagaqarusuppungami. Innarluutilittulli ilinniagaqartut ikiorserneqartarnissaat pillugu aaqqiissuumik ujartuivunga.