Inuussutissat tuluttut allagartalersukkat

Inuussutissat tuluttuinnaq allagartalersukkat siunissami tuniniarneqassinnaalissapput. Inuussutissat akikinnerusut siunertarineqarput.

Inuussutissat tuluttuinnaq allagartalersukkat tuniniarneqarsinnaanissaat, Inatsisartuni amerlanerussuteqartut aalajangeqqammerpaat.

Inuussutissat pillugit nalunaarummi inuussutissat kalaallisut, qallunaatut imaluunniit qallunaatungajak naqinnilersukkanik allagartalersorneqartarnissaat ullumikkut aalajangersagaavoq.

- Tassa imaappoq inuussutissanik allagartalersuisarneq immikkut aningaasartuutitaqassaaq nioqqutissat nunanik allaniit eqqussorneqarpata skandinaviaminngaanniiunngitsoq, taamaasillutik atuisartunut akit suli qaffaqqinnerusussaassapput, Steen Lynge (D), nalunaarutip allanngornissaanik Naalakkersuisunut peqqussummik siunnersuuteqartoq taama allappoq.

Taassuma inuussutissat annermik nunanit avannarlerneersuunerarpai, taakkunanilu tunisassiornermut aningaasartuutit qaffasinnerarlugit.

- Kalaallinut innuttaasunut akikinnerpaaq ujartariaqarparput nioqqutissat pisiniarnissaq eqqarsaatigalugit. Pisariaqarporli nunanit akikinnerpaamik tunisassiorsinnaasunit nioqqutissanik toqqaannartumik eqqussuisinnaalernissarput, Steen Lynge (D) allappoq.

Siunnersuutigineqartoq naapertorlugu, allagartaq tuluttuinnaq allaqqappat nioqqutissat sananeqaataanik nassuiaatit nalinginnaanerpaat atorneqartartut allattorsimaffiannik pisortatigoortumik peqassaaq.

Demokraatit saniatigut IA, Partii Naleraq aamma Atassut siunnersuummut akuersillutik taasipput.

Powered by Labrador CMS