Inuussutissat immuup sukkuanik akoqanngitsut akikinnerulersinneqarsinnaanersut misissorneqalersoq
Justus Hansenip Demokraatineersup siunnersuutaa Naalakkersuisunit tapersersorneqarpoq
Marlunngormat unnuakkut akitsuutit nutaat atuutsinneqalerput, ilaatigut mamakujuit, pujortagassat imigassallu akisunerulerneerannik kinguneqartumik, tamanna innuttaasunit akerlerineqarluinnarpoq.
Inuussutissalli immuup sukkuanik akoqanngitsut akikinnerulersinneqarsinnaanersut maanna misissorneqalerpoq. Inuussutissat laktosetaqanngitut atuisut pisariaqartitaat Naalakkersuisunit qanoq akikinnerulersinneqarsinnaanersut pillugu misissuisoqarnissaanik Justus Hansenip (D) siunnersuutaa Naalakkersuisunit tapersersorneqarpoq.
Naalakkersuisut akissuteqaataanni pingasunngorermi aappassaanik suliarineqartussami tamanna takuneqarsinnaavoq.
- Kalaallit Nunaanni atuisartunut nerisassat immuup sukkuanik akoqanngitsut qanoq ilillutik akikinnerulersinneqarsinnaanerisa misissorneqarnissaat pillugu amerlanerussutillit tapersersuinerat Naalakkersuisut nuannaarutigalugu malugaat, Inuussutissarsiornermut Naalakkersuisoq Jess Svane akissuteqaammini allappoq.
Misissuinissarsuaq
Ilanngullugu ilisimatitsissutigaa, piffissami matumani pisiarisartakkat akii appartinneqarsinnaanersut qanorlu ilillugit periarfissanut siunnersuuteqarnissamik siunertaqartumik Kalaallit Nunaanni pisiarisartakkat akiinik Naalakkersuisut maannakkut misissuisut.
- 2019-imi ukiap ingerlanerani paasissutissanik katersuineq annertooq Naalakkersuisut naammassivaat, taakkulu pisiarisartakkat akii appartinneqarsinnaanersut qanorlu ilillugit misissugarinissaannik siunertaqartumik misissoqqissaarneqassapput. Misissueqqissaarineruttaaq nerisassat immuup sukkutaqanngitsut atuisartunut nioqqutinik tamakkuninnga pisariaqartitsisunut qanoq akikinnerulersinnaanerinut periarfissat misissussavai , akissuteqaammi allassimavoq.