Inuussutissarsiutit nukittorsarneqassapput

Inatsisartut qallunaallu naalakkersuisuisa kalaallit qallunaallu inuussutissarsiortut suleqatigiinnerat annertusarniarpaat. Aningaasaliisunik ataatsimeersuartitsinermi Kalaallit Nunaat ataatsimiititsisuussaaq

Qallunaat inuussutissarsiornermut ministeriata Annette Vilhelmsenip, SF, nuannaarutigaa suleqatigiissitaliortoqarmat, Kalaallit Nunaanni inuussutissarsiornermik siuarsaaniartussamik.

Inatsisartut qallunaallu naalakkersuisui suleqatigiissitaliorput, taannalu siunnersuusiussaaq Kalaallit Nunaanni Danmarkimilu inussutissarsiortut aningaasarsiornikkut suleqatigiinnerat qanoq siuarsarneqarsinnaanersoq.
Siunertaavoq Kalaallit Nunaanni aningaasarsiornermut aningaasaliinerit annertusarneqarnissaat.
Tamanna ilaatigut pissaaq Kalaallit Nunaanni aningaasarsiornikkut atugassaqarluni inuussutissarsiutinut aningaasaliissuteqarnissamut aporfissat qulaajarneqarneratigut. Ilanngullugu suleqatigiissitaliap inuussutissarsiortut attuumassuteqartut suleqatigalugit Kalaallit Nunaanni aningaasaliissuteqarnissamut periarfissat nittarsaatissavai, tamatumani ilanngullugit nunatsinni pinngortitap pisuussutai, tamannalu pissaaq Kalaallit Nunaanni aningaasaliisunik ataatsimeersuartitsinissap piareersarneragut ingerlanneratigullu.
Suleqatigiissitaliaq pilersinneqassaaq inuussutissarsiornermut aatsitassanullu Naalakkersuisumit aamma inuussutissarsiornermut siuariartornermullu ministerimit ataatsimoorluni. Suleqatigiissitaliap inuttarissavai inuussutissarsiornermut, aatsitassanut sulisartoqarnermullu Naalakkersuisoqarfimmi atorfillit aamma inuussutissarsiornermut siuariartornermullu ministereqarfimmi atorfillit.
– Aatsitassarsiornermi inuussutissarsiutit ineriartortinnissaannut atatillugu kalaallit ingerlatsiviinut pingaaruteqarluinnarpoq siuariartornissamut suleqatissanik eqqortunik nassaarnissaq. Qallunaat inuussutissarsiortuinik suleqateqarneq sivisuumik ileqquusimavoq, suleqatigiinnerlu tamanna tamanut iluaqutaasumik ineriartortinneqarsinnaavoq. Qallunaat ilisimasaat kalaallit nunamik ilisimasaqarnerannik akullugu tamanna suleqatigiinnermut tunngaviussaaq nukittooq, inuussutissarsiornermut, aatsitassanut sulisartoqarnermullu Naalakkersuisoq Jens-Erik Kirkegaard, Siumut, oqarpoq.
Aamma inuussutissarsiornermut ministeriup Annette Vilhelmsenip, SF, tamanna nuannaarutigaa.
– Kalaallit qallunaallu ingerlatsivii suleqatigiinnissamut aallaavissarissaarput. Taamaattumik uannut aamma pissusissamisoorluinnassaaq qallunaat ingerlatsiviisa peqataalernissaat.

Powered by Labrador CMS