Kåre Moth-Lund Nuummeersoq, siornatigut KM-L Servicemik piginnittuusimasoq, suliniutini Avataq pillugu ilungersuuteqarpoq.

Suliniutip Imarsiornermik Ilinniarfimmit aamma Jens Sallingimit Nuummi umiarsualiveqarfiup eqqaani qeqertannguami inissisimaffik unammillerfigaa.

Kommunip ingerlatsiviata Kåre Moth-Lundip suliniutaata itigartinneqarnissaa politikerinut inassutigaa, Imarsiornermik Ilinniarfiup aamma Jens Sallingip suliniutaat akuereqqullugu.

Taamatut inerniliineq Kåre Moth-Lundip arlalinnik pissuteqarluni paasiuminaatsippaa. Taassuma suliniutini innuttaasunut amerlanerusunut iluaqutaassasoq oqaatigaa, kiisalu Avatamik suliniut inunnut isumaginninnermut tunngasuunerarpaa, taannalu ataatsimut naliliinermi pingaartinneqarsimanngitsoq.

Talittarfik, umiatsianut puttasut aamma atoqqiisarfik

Taamaammat kommunalbestyrelsi ammasumik allagaqarfigaa:

- Isumaqarpunga, suliniutiga ”Avataq” kinaassusersiunngitsumik suliarineqarsimasoq, atorfillit ataatsimiititaliap ataatsimiinnissaanut inassuteqaataat atuaraanni, naatsorsuutigaaraluaallaavimmut naleqquttumik suliarisimagissi

- Atorfillit killilerujussuarmik suliniutit inunnut aamma assigiinngissitaartumik sunniutaa isiginiarsimavaat, Kåre Moth-Lund allappoq.

Avataq suliniut umiatsianut nuannaariartaatinut talittarfimmik aamma umiatsianut puttasunik, atoqqiisarfimmik, betonitalinnik sanaartorfimmik kiisalu biilit unittarfiat aamma umiatsianut inissiisarfik matoqqasumik imaqarput.

- Qinnuteqaatiga naatsumik tassaavoq immikkoortup 2B5-ip eqqaani piffiup atorluarnissaa, taanna illoqarfimmi aalisartunut, piniartunut, immami angalasartunut iluaqutaassaaq minnerunngitsumillu innuttaasut immikkut ittumik pisariaqartitsisut suliaqartillugit.

Ingerlatsivik isorinnittoq

Suliniut Avataq itigartinneqartariaqartoq aningaasaqarnermut ataatsimiititaliaq kommunip ingerlatsivianut inassuteqaammi allappoq, ilaatigullu erseqqissaavoq:

- Qinnuteqartup assersuutigalugu Kofoed Skolemik suleqateqarnermik pilersitsiniarluni kissaatigaa, kisianni taanna siunertaannaavoq, siunertaq pillugu nalunaaruteqartoqarsimanngilaq imaluunniit suleqatigiinnissamik isumaqatigiissusiortoqarsimanani, ingerlatsivik allappoq.

Kåre Moth-Lundip siornatigut suliniut pillugu Kofoed Skolemut oqaloqatiginnissimalluni Sermitsiaq.AG-mut oqaluttuaraa, suleqatigiinnissamullu isumaqatigiissutaasinnaasoq, suliniutip piviusunngornissaa aatsaat qanillippat isumaqatigiissutigineqarsinnaasoq.

Taassuma nangilluni oqaatigaa, suliniutip unammillertaasup 'Nunataaq' suliarineqarnera isornartorsiorpaa:

- Suliniutit taakku marluk nalilersuinermut immersugassamik nalilersornerisigut ataatsimoortumik naliliineq anguneqassasoq malugeqquara, tassani suliniutip aappaani (Imarsiornermik Ilinniarfik) pingaartinneqartoq suliniutip aappaani aalisarnermut atortunut toqqorsivimmut aamma ilaasaaq, Kåre Moth-Lund oqarpoq.

Justus Hansenip suliarilluarneqarnissaa kissaatigaa

Aningaasaqarnermut ataatsimiititaliap suliarinninnerani ingerlatsiviup suliniummik itigartitsinissamut inassuteqaataanik Inuit Ataqatigiit, Siumut aamma Naleraq akuersipput. Kisianni suliniutip allamut inissinneqarsinnaaneranut tunngasumik ingerlatsiviup Kåre Moth-Lundimut oqaloqatiginninnissaanik piumasaqaatitaqartumik.

Demokraatit aningaasaqarnermut ataatsimiititaliamut ilaasortaatitaata Justus Hansenip suliniutip Avatap itigartinneqarnissaanik inassuteqaat akueriumanngilaa, ingerlatsiviullu Avataq suliniummik misissuilluaqqaarnissaannik kissaateqarluni Sermtisiaq.AG-mut oqaluttuarpoq.

Kommunalbestyrelsip suliniut sorleq siuarsarneqassanersoq aalajangertussaavaa. Kåre Moth-Lundip kommunalbestyrelsimi sassartitaalluni pilersaarutini pillugit oqaluttuarsinnaanissani neriuutigaa, ingerlatsiviullu Avataq nalilernerlussimagaa paasitikkusuppaa.

Kommuneqarfik Sermersuup suliamik suliarinninnermut isornartorsiut pillugu akissuteqartitsinissaq Sermitsiaq.AG-p sulissutigaa.

Nutaarsiassat

Innuttaasunik nutaanik Nuummut tikilluaqqusinermik aaqqissuussaq iluatsilluartoq

Pingasunngornermi ulloq 27. septembari Kommuneqarfik Sermersooq Nuummut innuttaasunik nutaanik nuannersumik paasissutissiinertalimmillu aaqqissuussaqarpoq.

Peqataasut...

Innersuussutit Nuup kangerluini aalisarnermik inuussutissarsiornerup siuarsarneqarnissaanut qulakkeerutaassapput

Sermersuumi sinerissap qanittuani aalisarnermut piniarnermullu siunnersuisooqatigiivi septembarip 20-anni 21-annilu aalisarnermik inuussutissarsiuteqartunut isumasioqatigiisitsipput, Nuup...