Inuussutissarsiutinik Ineriartortitseqatigiiffik nutaamik pisortassarsiussaaq
Innovation South Greenlandimi pisortaq Allan Chemnitz suliunnaalerpoq. Inuussutissarsiutinilli ineriartortitsinerup iluani suliaqarnini ingerlatiinnassavaa.
Allan Chemnitz Kujallermi inuussutissarsiutinik ineriartortitseqatigiiffimmi 2019-imi aggustip qaammataanili pisortaasimavoq, taamaalillunilu ukiuni pingasuni pisortaasimalluni.
Pisortaajunnaartup Sermitsiaq.AG-mut oqaluttuaraa, ilaquttani ilagalugit Nuummut utilerluni, Nuummi Innovation Greenlandimi pisortatut aggustip aallaqqaataani sulilertussanngorami.
Sulilinnginnermini feeriaqqaassaaq, Allan Chemnitzillu oqaatigaa, Kujataani ukiuni pingasuni ulapissimalluni, tassani aamma nunarsuarmi tuniluuttoqarnera sulineranut sunniuteqarsimalluni. Taamaammat feeriarnissamut piffissaqartarsimanani, taanna oqaluttuarpoq.
Innovation Greenland, Greenland Holdingip ataani Namminersorlutik Oqartussat inuussutissarsiutinik ineriartortitseqatigiiffiutigaat, Allan Chemnitzilu taamaalilluni suliarisartakkami assiganik suliaqarnerminik ingerlatsiinnassalluni.
- Kommunimut iluaqutaasinnaasoq
Kommuni Kujallermi borgmesterip Stine Egedep (IA) ajuusaarutigaa pisortap suliunnaalernera, allamilli suliffeqarusulersimanera akuersaarlugu:
- Allanip unittussanngornera uggoraara, taamaattorli nutaanik pissanganartunik ujarlerniarnera akuersaarlugu. Allan tamanik ajunnginnerpaanik kissaappara, suliffittaavanilu siunissami Innovation Greenlandimi pisortatut suleqatigilluarnissaa neriuutigalugu. Kommunitsinni inuussutissarsiutitigut periarfissat Allanip ilisimaarilluarpai, Innovation Greenlandillu kujataani inuussutissarsiutitigut ineriartortitsinissami periarfissanik ilisimaarinnittoqarnera kommunitsinnut iluaqutassaaq, udtaler Stine Egede ifølge Kommune Kujalleqs hjemmeside.
Aamma Innovation South Greenlandip siulersuisuini siulittaasup Steffen Lundip pisortaajunnaalersoq Nuummi ingerlalluarnissaanik kissaallugu oqaaseqarfigaa .
Pisortassarsiortoqassasoq
- Allanimik suleqateqarluarsimanerput qujassutissaqarfigaara, taassumammi ISG-p aallartisarnera peqataaffigisimammagu, taamaaliornermigut Kommune Kujallermi nutaaliornernik inuussutissarsiutinillu inerisaanermut tunngasunik qulequtsiisarsimammat. Inuttaa ilaqutaalu siunissami ajunnginnerpaanik kissaappakka.
Kommunip Innovation South Greenlandimi pisortassatut atorfik ulluni qaninnerni inuttassarsiuutissavaa.