Inuussutissarsiortut atorfimmik atornerluineq misissortikkusussimagaluaraat
Ingerlatsinermilli kukkunersiuinermi inerniliissutigineqarpoq, unioqqutitsisoqarsimaanngitsoq, taamaattorli kommuni kaammattorneqarluni najoqqutassanik maleruagassanillu ersarissunik suliaqaqqullugu
Kommune Kujallermi inuussutissarsiortut Kommune Kujalleq pillugu ingerlatsinermik misissuineq, Deloittemit aamma Nuna Advokaternermit ingerlanneqarsimasoq, naammaginngilaat. Tamatumani vicekommunaldirektør Carsten Frank Hansen pillugu pissutsit arlalissuit pineqarput, taakkualu ”inuussutissarsiornermik suliffeqarfiit paasinnittaasiat naapertorlugu iternga tikillugu misissorneqartariaqaraluarlutik”.
Saaffiginnissut Qaqortumi inuussutissarsiortut sinnerlugit Erik Nørskovimit aamma Rasmus Chr. Rasmussenimit atsiorneqarsimavoq. Erik Nørskov sapaatip-akunnerata siuliani juunip 12-ani Qaqortumi Sulisitsisut immikkoortortaqarfiannut siulittaasutut nutaatut qinigaavoq. Ingerlatsinermik kukkunersiuineq ingerlanneqareersimavoq misissuinerlu sapaatip-akunnerani kingullermi pingasunngornermi juunip 17-iani kommunip aningaasaqarnermut ataatsimiititaliaani oqaluuserineqarluni, tassanilu tusaatissatut tiguneqarluni.
Misissuinermi pingaarnertut inerniliissutigineqartoq tassaavoq, unioqqutitsisoqarsimanngitsoq.
Erik Nørskovip inerniliineq isumaqatiginngilluinnarpaa, inerniliinerlu eqqoqqissaannginnerarlugu ersernerlunnerarlugulu. Tassanngami Carsten Frank Hansen pillugu pissutsit, inuussutissarsiortunit iternga tikillugu misissorneqartariaqartutut isumaqarfigineqartut, misissorneqarsimanngillat, taanna oqarpoq. Erik Nørskov allaninngaanniit ilisimatinneqarsimavoq, ingerlatsinermik kukkunersiuineq kukkunersiuisutut ilinniartitaanermi akuerineqarsimanavianngikkaluartoq. Kukkunersiuisut ilinniartoq assingusumik allagaqarsimagaluarpat, taanna angusinngitsoorsimassagaluarpoq, Erik Nørskov ersarilluinnartumik naliliivoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: