Inuussutissarsiornermut tapiissutit aalisarluartunut tunniunneqartartut
Aalisarnermik Ineriartortitsinermut Aningaasaateqarfimmit aningaasat aalisartunut pisaqarnerpaasimasunut, taamalu aamma isertitaqarnerpaasimasunut tapiissutigineqarnerusartut, nalunaarusiami takuneqarsinnaavoq
Sermitsiaq.AG-mit ukioq manna siusinnerusukkut sineriammut qanittumi saarullinniarneq pillugu nalunaarusiaq takuneqarsimavoq. Nalunaarusiornermi ilaatigut misissorneqarsimavoq, aalisarsinnaanermut akuerissutinik pigisallit kikkut Aalisarnermik Ineriartortitsinermut Aningaasaateqarfimmit tapiissutisisarnersut.
Aningaasaaateqarfimmit tassannga Siumumi politikkerit nuimasut pingasut, tassaasut Karl Kristian Kruse, Nikkulaat Jeremiassen aamma Henrik Fleischer umiatsiarsiutissaminnut tapiiffiginqarsimapput.
Nalunaarusiami inerniliunneqarsimavoq, aalisarsinnaanermut akuersissutillit 25-iusut 2018-imi sineriammut qanittumi saarullinniarnerminni tunisaqarnerpaasimasut akornanni qulit inuussutissarsiumminnut tapiiffigineqarsimasut.
2018-imi saarullinniarnissamut akuersissutillit katillutik 1255-iusimapput. Taakunannga saarullinniarnissamut akuersissutillit 25-t sineriammut qanittumi saarullittassiisutit 35 procentiinik pisassinneqarsimallutik.
Aalisarsinnaanermut akuersissutillit tallimat tunisaqarnerpaasimasut
2018-imi saruullinniarnermi tunisaqarnerpaasimasut taakku tallimat katillugit uku nalingannut tunisaqarsimapput:
1: 5.355.477 kr.
2: 6.051.552 kr.
3: 2.658.487 kr.
4: 3.512.383 kr.
5: 3.172.383 kr.
Pissarsiffik: Sineriammut qanittumi saarullinniarnerup ineriartornera pillugu nalunaarusiaq
18,7 mio. koruuninik tapiiffigitissimasut
- Inuussutissarsiornermut tapiissutinik pissarsisimasut taakku qulit, ukiut qulit kingulliit ingerlaneranni nutaanik aalisariutitaarnissamut isaterinissamullu katillugit 18,7 mio. koruuninik tapiiffigineqarsimapput.
- Tamatruma saniatigut aamma tallimaasunit 2018-imi tunisaqarnerpaasimasunit taakkunannga sisamat inuussutissarsiornermut tapiissutinik 18,7 nio. koruuninik pissarsisimasut, nalunaarusiami allassimavoq.
Tapiissutit angallatinik nutaanik pisiaqarnermut isaterinermulluunniit atorneqartarsimapput.
Nalunaarusiaq Aalisarnermut, Piniarnermut Nunalerinermullu Naalakkersuisoqarfimmit suliarineqarsimavoq, tassanilu erseqqissaatigineqarpoq isaterinissamut tapiissutinik pissarsisinnaanermut malittarisassat 2014-imi allanngortinneqarsimasut. Allanguut taanna naapertorlugut, isaterinissamut tapiissutisisut, angallatimik isaterneqarneranni aalisarnermik inuussutissarsiorunnaassanngitsut, tapiissutilli pissarsiaat angallammik nutaamik pisiaqarnermut atorneqarsinnaasut.