Inuussutissarsiornermut Siunnersuisoqatigiit suleqatigiinnerussasut
Nunap immikkoortuini assigiinngitsuni nunamilu namminermi inuussutissarsiornermik ineriartortitsisut akornanni suleqatigiinnerup nukittorsarneqarnissaa pillugu suliaqarluni isumasioqatigiinnermut Innovation Greenland sapaatip akunnerata matuma aallartinnerani aaqqissuussisuuvoq.
Workshoppertitsinermi nunap immikkoortuini assigiinngitsuni inuussutissarsiornermut siunnersuisoqatigiit ’Inuussutissarsiutinik siuarsaanermut attaveqaqatigiittarfissaat’ pilersinneqarpoq, siunnersuisoqatigiit sulinerminni imminnut ataqatigiinnerulersinniarlugit.
- Nunap immikkoortuini inuussutissarsiornermi siunnersuisoqatigiit suleqatigalugit aatsaat pitsaanerpaamik ingerlasinnaavugut, tassami taakkua suleqatiginerisigut sullississutigut nunatsinni sumiiffinnut tamaginnut annguttarput, Innovation Greenlandimi pisortaq Christian Wennecke tusagassiorfinnut nalunaaruteqarnermi oqarpoq.
Oqaloqatigiittuartarnissaq
Nunap immikkoortuini inuussutissarsiornermi siunnersuisoqatigiit tamarmik kommunimiipput, imaluunniit kommunimut kiffartuussinissamut isumaqatigiissuteqarlutik. Taakkua najukkani sumiiffimminni inuussutissarsiornermut siunnerfilimmik ineriartortitsinermik suliaqarnertik, aammalu inuussutissarsiortunut, ilinniartitaanermi periaatsimut kommunimilu allaffissornermut qanittuaqqamik attaveqarnertik ataatsimoorutigaat.
Suleqatigiinneq pillugu isumasioqatigiinneq 2021-p ingerlanerani nunap immikkoortuini tamaginni aaqqissuunneqarsimasoq, kiisalu ingerlaavartumik oqaloqatigiilluartarneq aammalu aallarnisaasunik pikkorissaanernik ingerlatsinissaq pillugu suleqatigiilluarneq, suliaqarluni isumasioqatigiinnermi inerisaqqinneqarput.
Ukiumut pingasoriarluni ataatsimeeqatigiittarneq
- Siunissami ataatsimoorluni suliniutissaq, attaveqaqatigiit aningaasarsiornerulersitsisarnerup ingerlaannarnissaa qulakkeerniarlugu sulissutiginiagaat, tassaavoq – Innovation Greenland-imit ingerlanneqartumik – inuussutissarsiornerup ineriartortinneqarneranut digitalimik ataatsimoorfissamik ataatsimik arlalinnilluunniit pilersitsinissaq, nalunaarummi allassimavoq.
Maannamut attaveqaqatigiit ukiumut pingasoriarlutik ataatsimiittarnissaq isumaqatigiissutigaat, taakkunani ataaseq naapilluni ataatsimiinnerussaaq, nunap immikkoortui tulleriiaarlutik paarlakaatissallutik, ataatsimiinnernut siunertaavoq suliniuteqarnerit pitsaanerusumik ataqatigiissaarneqarnissaat aammalu unammilligassamik periarfissamillu ilisimasaqarnerulernissaat.
Kalaallit Nunaanni inuussutissarsiornermut siunnersuisoqatigiit arfiniliupput, tassaasut Avannaata Inuussutissarsiornera, Sermersooq Business, Arctic Circle Business, Innovation South Greenland A/S, Qeqertalik Business Council A/S kiisalu Innovation Greenland A/S.