Inuussutissarsiornermut siunnersuisoqatigiit Nunarsuarmi Kingornussassaatinneqartumut suliaqartunngorpoq
Innovation South Greenland aamma Kujataani nunarsuarmi kingornussassaatinneqartumut suleqatigiit kattupput.
Kujataani suliffinnik ineriartortitsinermik suliartut, Innovation South Greenland, ISG, aamma Kujataani nunarsuarmut kingornussassaatinneqartumut suliaqartut kattupput.
Unescomi nunarsuarmut kingornussassaatinneqartumut allaffissornikkut suliat Kommune Kujallermiissimasut maanna ISG-p ataani suliarineqartalissasut, tusagassiorfinnut nalunaarutigineqarpoq.
Nikeriarneq nalinginnaalluinnartoq
- Taamatut ataatsimuulersitsinerup kinguneriinnassavaa, ISG-p suliassareriigai tassaasut; Takornariartitsisarnerup ineriartortinneqarnera, Inuussutissalerinerup ineriartortinneqarnera, Nunalerineq, Imminullu pilersornerulernissamik suliaqarneq kiisalu Aatsitassarsiornermut tunngasunik suliaqarneq, tassami tamakku suliniutit UNESCO-p Nunarsuarmi Kingornussassat pillugit suliniutaanut ilaareermata, allassimavoq.
Aka Simonsen Site Managerimi 15. april aallartippoq, Arnaq Bjerge Petersenilu Kujataa Kujataa Park Rangeritut ingerlaqqilluni. Taanna 2018-imili tassani atorfeqalerpoq. Taakku marluullugit maanna ISG-mi atorfeqalerput.
Kommunip innersuussutaa
ISG-mi takornarialerinermik pisortap, Sarah E. Woodallip suleqatigiilernissaq qilanaaraa.
- Uannut tunngatillugu ulluinnarni ineriartortitsinerput ingerlaqqiinnassaaq, tassami suliat assigiinngitsut marluk immikkoortunngorlugit suliarisarneri ataatsimoorullugit suliarilissagatsigit. Ukiuni qaangiuttuni kingullerni sisammaa affarmi allaffeqatigeereerpugut, suliassallu assigiinngitsut ataatsimoorullugit suliarisareerlutigit, soorlu piffinni assigiinngitsuni aqqissuusseqatigiittarnerit, nunap immikkoortuini assigiinngitsunik ineriartortitsinerit, tuniniaanermut tunngasuni, paasisitsiniaanerit aammalu Namminersornerullutik Oqartussat ingerlataannik ”Greenland Visitor Center”-imik suleqateqarluni paasissutisseeqatigiittarnerit kiisalu nunatsinni takornariagassaqqissunik toqqartuisarnerni suleqatigiittareersugut, oqarpoq.
Kommune Kujallermi kommunalbestyrelsep immikkut ittumik ataatsimiisinneqarnerani kommuni innersuussivoq suliat Kujataani nunarsuarmut kingornussassaatitaanermut tunngasut UNESCO-mut atassuteqartut ISG-mut nuunneqassasut.