Inuussutissarsiornermik ingerlataqartunut ikiorsiissutit sivitsoqqinneqartut

Inuussutissarsiortunut ikiorsiissutit kiisalu takornariartitsinermik inuussutissarsiortunut ikiorsiissutit taamatullu immikkut ittumik ikiorsiissutit ulloq 1. oktoberimit 31. december 2020 ilanngullugu sivitsorneqarnissaat Naalakkersuisut aalajangersimavaat.

Inuussutissarsiornermik ingerlataqartunut ikiorsiissutit sivitsorneqarnissaannik aalajangersimaneq Sulisitsisunit nersualaarneqarpoq.

- Suliffeqarfinnut annertuumik eqqugaasimasunut tamanna qulakkeerinnilluartuuvoq, Sulisitsisut pisortaat Brian Buus Pedersen Sermitsiaq.AG-mut oqarpoq.

Pingaartumik akunnittarfiiit neriniartarfiillu kiisalu takornariartitsisartut corona pissutaalluni killilersuinernit suli malugisaqarput.

Pisortarli aamma mianersortumik neriuuteqartoq takuneqarsinnaavoq.

-Aasap ingerlanerani tapiissutissanik qinnuteqartartut ikiliartorsimapput. Ajunngitsumik ingerlasoqarneranut tamanna takussutissaavoq, taamaakkaluartorli pingaaruteqarpoq ikiorserneqarnissamik pisariaqartitsisoqalissagaluarpat, ikiorsiissutit suli qinnuteqarfigineqarsinnaanerat, pisortaq erseqqissaavoq.

Sivisuallaamik ingerlanneqassanngitsut

Naalakkersuisut ikiorsiissutinik sivitsuineq pillugu tusagassiorfinnut nalunaaruteqarnermi allapput, inuussutissarsiornermik ingerlataqartunut ikiorsiissutit piffissap ingerlanerani ataavartumik suliniutinngortussaanngittut.

- Tamanna niuernermik aallaaveqartumik aningaasarsiornermi suliffeqarfinnut namminersortunut ataavartumik tapiissutit sanngiillisitsisarnerannik, pisariaqartumillu nalimmassarnissamik akornutaaneranik isumaqarneq aallaavigalugu pivoq. Naggataagullu akit qaffasinnerusut atuisartunut akornutinnguuttarput, Naalakkersuisut allapput.

Coronalli atugarliortitsinera qaanerneqassappat aningaasaritugut ikiorserneqartarnissaq, taamalu ikiorsiissutit sivitsorneqarnerat suli pingaaruteqarput, Brian Buus Pedersen oqarpoq.

- Inuit ilaannut taakku suli pingaaruteqarput. Suleqatigiissitami oqaatigisarparput: qinnuteqartartut ikiliartoraluartut ikiorsiissutit unitsinneqassanngitsut. Unitsikkallaqqusarpavut, pisariaqartinneqaqqilissappata atoriaannaaqqullugit. Inuit pisariaqartitsinerminni taamaallaat qinnuteqartarput, Brian Buus Pedersen oqarpoq.

Powered by Labrador CMS