Inuussutissalerinermut ministeri: – Aaqqiissutissaq piviusorsiortoq peqataaffigerusuppara
Kalaallit Nunaanni Naalakkersuisut isumaqarput uumasunut nakorsaqarfiup inuussutissalerinermullu oqartussaaffeqarfiup tamakkiisumik nunatsinnit oqartussaaffigineqalerneratigut nunatsinnit avammut inuussutissanik nioqqutissiornermut iluaqutaassasoq. Danskit inuussutissalerinermut ministeriat Rasmus Prehn (Socialdemokratiet) kissaatigineqartoq pillugu suleqataarusuppoq, Sermitsiamullu uppernarsaavoq suliassaqarfimmut tunngatillugu kissaatit unamminartullu qulaajarneqarnissaannut sulineq aallartinneqartoq.
Uummasunut nakorsaqarnerup aammalu inuussutissalerinerup oqartussaaffigineqarnerata nunatsinnit tamakkiisumik ilaannakortumilluunniit tiguneqarsinnaanissaa pillugu inuussutissalerinermut ministeriaqarfiup naalakkersuisullu akornanni oqaloqatigiinnerit maanna aallartinneqarput.
Inuussutissalerinermut ministeri Rasmus Prehn (A) erseqqissaavoq, inuussutissanik avammut nioqquteqarnerup annertusarneqarnissaanik Kalaallit Nunaannit kissaatigineqartoq pillugu danskit tungaanniit paasineqarsinnaalluartoq:
– Aalisarnerup Kalaallit Nunaanni qitiulluinnartumik inissisimanera pillugu Danmarkimit annertuumik paasinnissinnaalluarpugut, taamatuttaaq avammut tunisassiornermi nioqquteqarnermilu unammilligassat pillugit paasinnilluarpugut. Aalisarneq Kalaallit Nunaata oqaluttuassartaani annertoorujussuarmik inissisimavoq. Peqatigiilluta ikioqatigiillutalu qulakkeerniartussaavarput, siunissamik taamaaginnassasoq, Rasmus Prehn (A) Sermitsiamut oqarpoq.
Tigussaasumik iliuuseqarnissamut tunngatillugu Rasmus Prehn (A) ilisimatitsivoq kissaatigineqartut unammilligassallu soorpiarnerisa qulaajarneqarnissaat pillugu sulissuteqartoqalersoq.
Aviisimi Sermitsiami atuarnerusinnaavutit: