Inuup timaata ilai angummit kalaallimeersuussagatinneqartut
Politiinit oqaatigineqarpoq, inuup timaata ilai Ilulissani nassaarineqartut angummit kalaallimeersuusut ilimanarluinnartoq. Politiit KNR-mut taamatut oqaluttuarput.
Politiit pingasunngornermi ualikkut oqaluttuaraat, Ilulissani ikuallaavimmi eqqakkat akornanni nassaarineqartut atorlugit angutip kinaanera politiit paasiartuleraat.
Misissuisut pisortaata suliami immikkuualuttut KNR-imut oqaalluttuarai:
- Toqutaasup kinaanera paasingajalerunarparput. Pineqartullu angutip kalaaliunissaa ilimagilluinnarparput. Vicepolitiinspektøri Ilulissanilu toqutsisoqarsimanerani suliap misissuiffigineqarnerani aqutsisoq Jan Lambertsen KNR-imut oqarpoq.
Pingasunngornermi tusagassiortuni katersortitsisoqarmat Jan Lambertsenip aamma ilisimatitsissutigaa, toqungasup kinaaneranik politiit erseqqissumik oqaaseqarsinnaatinnagit suli misissugassaqartoq.
Qaterisartut ikuallaavimmi eqqakkanik politiit misissuinerannut ikiuupput. Misissuineq ataasinngornermi naammassissangatinneqarpoq, misissuisullu aqutsisuat naapertorlugu eqqakkat akornanni arlalinnik nassaartoqarsimasoq politiinit misissoqqissaarneqartussanik.