Inuuniarnermik ajornartorsiortunut suliniutit amerleriaateqarluartut

Kalaallinut inuuniarnermikkut ajornartorsiuteqartunut Danmarkimiittunut suliniutit amerleriangaatsiarsinnaanngorput. Tamanna paasinarsivoq satspuljemi 2017-2020-mut atuuttussami amerlanerussuteqartut akuersissutigimmassuk.

13 mio.-nit 36-mio.-nut

Kalaallinut ikiorsiissutit ukiup naanerani atorunnaassaaq. Tassungalu 13 mio. Koruunit aningaasaliissutigineqarnikuullutik. Maannalu 2017-2020-mut atuutilersussamut 36,4 mio. Koruunit aningaasaliissutaasussanngorlutik. Tassa pingasoraarterummik annertusineqartussanngorlutik.

- Tamanna iluatsimmat tulluusimaarutigeqaara, Aaja Chemnitz Larsen (IA) oqarpoq.

Atuaruk: Kalaallit inuuniarnermikkut ajornartorsiuteqartut 46 mio. koruuninik aningaasaliiffiginerput

Isumaqatiginninniaqataanngilaq

Socialministerip Karen Ellemannip (V) isumaqatiginninniarnerani Aaja Chemnitz Larsen peqataasinnaasinnaatitaasimanngilaq. Ukiulli ingerlanerani ajornartorsiutip eqqumaffigineqarnerulernissaa anguniarlugu suliaqarsimalluni, ilaatigut tusarniaasimalluni.

- Kalaallit Nunaannit folketingimi ilaasortartut suliaq kisima ingerlassimavara, Aaja Chemnitz Larsen (IA) oqarpoq.

Danskit politikkerit sunnerpai

Isumaginninneq pillugu politikkikkut oqaaseqartartut ajornartorsiut pillugu ataatsimeeqatigisarsimavai. Kalaallit Danmarkimi najugallit amerlanerit ajunngitsumik inuuneqaraluartut isumaginninnermi sullinneqartut amerlavallaarput.

-Isumaginninneq pillugu oqaaseqartartut tunngavilersuutikka paasilluarsimavaat, isumaqatiginninniarnermilu ilanngussimallugit, Inuit Ataqatigiinnit folketingimi ilaasortaq oqarpoq.

Suliniutit pinaveersaartitsissapput

Kommunit, peqatigiiffiit, suliffeqarfiit Kofoed Skoletut ittut Kalaallillu Illui suliniutinut sunut aningaasaliissutit atorneqassanersut apeqqutaaginnalerput.

Suliniutaareersullu nukittorsarneqassasut Aaja Chemnitz Larsenip pingaartippaa. Nunatsinni najugaqartut ingerlalluaraluartut Danmarkimut nuunnerminni ajornartorsiulertartunut suliniutit ingerlateqqinneqassasut isumaqarpoq.

- Danmarkimut nuuttut piaartumik sullinneqartalernissaat pingaaruteqarpoq. Taakkununngami inuiaqatigiinnullu iluaqutaasorujussussammat, oqarpoq.

Sulisoqarnerulernissaanut aningaasaliineq

Sulisoqarnerulernissaanut aningaasat atorneqassanerarlugit tunngavilersuinini folketingimi politikkerit ministerillu isumalluartilersimavai. Taassumami ministerit sisamat, sulisitsinermullu ministeri Jørn Neergaars Larsen (V) tallimaralugu ataatsimeeqatigisarsimavai.

- Noorlaanut aningaasaliinissamut siunertat kinguneqarluarsinnaasut paasisimaavaat. Taakkumi sulilernissaannut suliniuteqartoqarmat, Aaja Chemnitz Larsen nassuiaavoq.

36,4 mio. Koruunit saniatigut 10 mio. Koruunit Naalakkersuisut meeqqanut inuusuttunullu suliniutaannut atorneqassapput.