Skip to main content

Inuuneq ateraara - aterisinnaanngilarali

Inuit aqqi pillugit inatsip allanngortinneqarnissaanut inuit 1072-it atsioqataapput. Kristinep Mads Peterlu paniat Inuuneq aterisinnaanngilaa. Aterli Anarfik aterineqarsinnaavoq

Kristine aamma Mads Peter Heiselberg ungasinngitsukkut atsiortitsinernik katersuipput, tassa Inuit Aqqinut Akuersisartut oqaatsip inuuneq inuit aqqisut akuerineqarnissaanik qinnuteqaatertik itigartimmagu, meeqqamut kingunipiloqarsinnaasutut tunngavilersuutigalugu. 

Atsiornerit 1072-it ilinniartitaanermut, oqaluffeqarnermut, kultureqarnermut naligiissitaanermullu naalakkersuisumut Nick Nielsenimut, Siumut, sisamanngornermi nalunaaqutaq 14.00 tunniunneqassapput. 

- Oqaatsinut kulturimullu akisussaaffeqarlunga naalersuisutut, oqaatsitta kulturittalu, nunat allat assigalugit, ineriartornerat pillugu oqallinnermut peqataarusullungalu erseqqissaaqataarusuppunga. Oqaatsit kulturilu allanngujuitsuunngillat, ineriartortuartuullutilli. Tamanna aamma isumaqarpoq inuiaqatigiit ineriartortuartuusut, taamaalillunilu aamma qanoq inummik atsiisinnaanermik paasininneq allanngoriartortarluni. Inuit aqqisut akuerisaasut allassimaffianni aqqit ullumikkut atorneeruttut takusinnaavagut, aqqit ullutsinni naapertuutinngitsumik isumaqartinneqartut, kisiannili siusinnerusukkut meeqqanut atsiunneqartartut, kulturikkut oqaluttuarisaanikkullu pissutsit – ullutsinni takussaanngitsut - naapertorlugit, Nick Nielsen oqarpoq. 

Nick Nielsenip maluginiarpaa aqqit akuerisaasut amerlasuut ullutsinni atorneqarunnaartut. 

- Anarfimmik aamma Arnapalaamik ateqartoqarsinnaappat tupiginngitsuunngilara, sooq aqqit 'ajortumik' isumaqanngivissut ammaffigineqarnerunnginnersut. Kisiannimi qanoq nalilissavarput ateq meeqqamut ajoqutaassanersoq? Takusinnaasakka malillugit tamanna ajornakusoornersaavoq, kingullertigullumi oqallinnerup tamanna uppernarsartutut ippaa. Tassungali tunngatillugu aamma oqaatigisariaqarpoq ateq nalinginnaalluinnartoq atorneqakulasorlu aammattaaq uumisaarissutaalersinnaammat. Ateq uiguusilaaraanni uumisaarutaalernissaa aanaralaarsuaq – meeqqat inersimasulluunniit uumisaariniarunik uumisaarutissaminnik nassaassaqqaarput, ateq sunaluunniit pineqaraluarpat, Nick Nielsen oqarpoq. 

Inuit Aqqinut Akuersisartut Inuit aqqi pillugit inatsimmi Kalaallit Nunaannut 1986-imi atuutilersinneqartumi aalajangersagaq atorlugu kalaallit aqqi atitut siulequtitut atorneqarsinnaanersut atorneqarsinnaannginnersulluunniit aalajangiisarput. 

Inuunerup Facebookkimi quppernera ugguuna takuneqarsinnaavoq

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER