ujaasineq

'Inuuneq' allamit aterineqarnerluni?

Ilaqutariit Heiselberg panertik Inuunermik atsernissaa suli sukataaruppaat. Tusarsimavaat Nunatsinni taama ateqartoqartoq

Ilaqutariit Heiselbergikkut paniat juulimi kuisissaaq

Kirstine T. Heiselberg Sermitsiaq.AG-mut oqaatigaa panertik Inuunermik atsernissaa suli neriuutigalugu.

- Panerput kuisingajalerpoq, ajoraluartumik Inuunermik atserneqarnavianngilaq. Ilinniartitaanermut, ilageeqarnermut, kultureqarnermut naligiissitaanermullu naalakkersuisup Nick Nielsenip nalunaarfigaatigut peqqussut aasaanerani atuutilersinneqassasoq. Taamaattumik atip naliliisartunut qinnutigineqarsinnaanera periarfissaalissalluni. Inuunermik Nuummi atsiisoqareersimasoq tusarliunneqarpugut. Sisimiuni aamma taama ateqartoqartoq paasitinneqarpugut. Ilumut tusakkagut eqqortuunersut maannakkut misissorparput, Kirstine T. Heiselberg oqarpoq.

Panertik juulip tallimaani kuisissasoq oqarpoq.

Suliarineqartut
Niviarsiaqqamut angajoqqaajusut Inuunerup aterinissaanut atsiornernik katersititsimmata ilisimaneqalerput, tamanna 2013-mi aallartippoq.

Inuit aqqinik akuersisartut Inuunerup aterineqarnissaa itigartitsissutigereeraat Inatsisartut ombudsmandiat decemberimi aallartittumik misissuilluni aallartippoq ateq Inuuneq atorusullugu itigartitsineq pillugu.

Aamma Oqaasiliortuni oqallisigineqarpoq kiisalu Nick Nielsen pisumut sooq akulerussimanersoq apeqquserneqarpoq. Biskop Sofie Petersenip oqaatigaa inuit aqqinik akuersisartut sulinermi toqqissisimajunnaartut naalakkersuisut aalajangersaasartut suliaannut akuliuttalermata.

Nunartaasoqassava?
Nittartakkami taasititsinermi atsiisarnernut inatsit amerlanerussuteqartunit allanngortinnissaa akuersaarneqarpoq. Taasineq 1.455-init peqataaffigineqarpoq. 60,89 procentit isumaqarput inatsit nutarsarneqassasoq, 31.41 procentit maannakkut atuuttunut allannguisoqannginnissaa kissaatigaat, 7,7 procentit pisumut isummersimanatik taasillutik.

Kalaallit Nunaanni 'Inuuneq'-mik atilimmik nalunngisaqarpisi?Nalunngisaqarussi redaktion@sermitsiaq.ag-imut allassinnissassinnut tikilluaqqusaavusi

Powered by Labrador CMS