Inuulluaqqusineq kingulleq: Pukkitsunnguulluni Nuuk qulaatissagaa
Tallimanngornermi nalunaaqutaq 11.45-12.15 innuttaasut Norsaq naggammik takusinnaassavaat, taanna illoqarfiit pingaarnersaat qulaallugu pukkitsunnguakkut timmilluni angalaffissaminut ingerlassaaq.
Inuulluaqqusinissamut periarfissaq kingulleq.
Norsaq februaarip qiteqqunnerani naggataamik ilaasunik angallassisoq, ilisimaneqareersutut tunineqarnikuuvoq, maannalu USA-p tungaanut timmisussanngorpoq.
Tassungalu atatillugu Norsaq pukkitsunnguakkut Nuuk qulaallugu timmissasoq Air Greenland aalajangerpoq.
Timmisartortitseqatigiiffik Facebookimi taama allappoq.
Weekendimi malinnaagit
Nuummiikkuit aamma silagissappat, taava Norsaq aqagu tallimanngornermi nalunaaquttap 11.45-12.15 akornanni takusinnaavat.
- Tamannalu puigunaatsuussasoq qularinngilarput. Assiliinissaq eqqaamagiuk, assilisatillu aamma takusassiaralugit, allatami tamanna oqaatigineqarpoq.
Air Greenlandip Facebookimi quppernerani weekendimi malinnaasinnaavutit, tassani Norsap Kalaallit Nunaata qimanneranit qanoq pinissaa oqaluttuarineqassaaq.