Inuttassarsiussat: Utoqqaat illersuisuat aamma innarluutillit illersuisuat
Namminersorlutik Oqartussat illersuisutut atorfinnut marlunnut pingaarutilinnut inuttassarsiuileruttorput, taakku utoqqaat inuillu innarluutillit pillugit oqaluuserisassanik aalajangersaasassapput.
Ilisimaneqareersutut illersuisut marluk Inatsisartunut qinersisoqarnissaa sioqqullugu upernaaq soraarput.
Christina Johnsen, inunnut innarluutilinnut illersuisuusimasoq illersuisoqarfiit kattunneqarnissaanut pilersaarutinut akerliulluni maajip naanerani soraarpoq.
Utoqqaat illersuisuat Helene Heilmann 2021-mi februaarip naanerani atorfimminit tunuarpoq, kisianni isumaginninnermut naalakkersuisoqarfiup suna pissutaanersoq ilisimatitsissutigisinnaasimanngilaa.
Illersuisoqannginnerup kinguneranik Tilioq Kommuninut, Inatsisartunut, Naalakkersuisunut imaluunniit inuiaqatigiit sinnerinut nalunaarusiamut innuttaasut saaffiginnittarneri pillugit suliareqqammisamini saqqummeqqammertumut atatillugu inassuteqarsinnaanngilaq.
Taartissat ujartorneqartut
Illersuisunik nutaanik ujaasineq maanna ingerlavoq.
Isumaginninnermut naalakkersuisoqarfik atorfimmut inuttassarsiornermi ”utoqqaat soqutigisaannik iluaqusiisussamik nukittuumik pissarsiorpoq”
Atorfimmut qinnuteqaatit juulip 17-anni kingusinnerpaamik nassiunneqassasut, naalakkersuisoqarfik ilisimatitsivoq.
Utoqqaat illersuisuata siunnersuineq ilitsersuinerlu suliassarai, utoqqaallu inuiaqatigiinni atugaat pillugit, inuiaqatigiinnilu oqallinnernut peqataasarneq aamma suliassaallutik.
Qinnuteqarfissaq qaangiuttoq
Namminersorlutik Oqartussat inunnut innarluutilinnut illersuisumik nutaamik aamma pissarsiorput, inuit innarluutillit atugaannik oqaluuserisassanngortitsisussamik.
Qinnuteqarnissamut piffissaliussaq sapaatip-akunnerata siuliani qaangiuttoq, Meeqqanut, inuusuttunut ilaqutariinnermullu naalakkersuisoqarfik ilisimatitsivoq, inunnullu innarluutilinnut illersuisussarsiorneq ingerlasoq, taamaammallu innarluutilinnut illersuisumik qaqugu Naalakkersuisut toqqaassanersut ilisimatitsissutigineqarsinnaanngitsoq.