Inuttamut allamut pasilliuteqarneq unnerluussisup akerlilerpaa

Illersuisup Birnamik toqutsinermi Polar Nanormi inuttamut allamut pisuutitsiniarluni periusissiorsimanera unnerluussisup ilumuunnginnerarpaa.

Thomas Møller Olsenip, allaanngitsup Birna Brjánsdóttir naalliutsippaa kingornalu imaanut igillugu. Reykjavikimi nunap eqqartuussisuuneqarfiani tamanna unnerluussisussaatitaasup Sigrid Friðjónsdóttirip saqqummiuppaa. Mbl.is taama allaaserisaqarpoq.

Thomas Møller Olsenip siorna eqqartuussivimmi nassuiaanermini Polar Nanormi inuttaq alla pisuutinniarsaraa. Tamannalu aamma illersuisuata nutaap Björgvin Jónssonip periusissiaani qitiusumik inissisimavoq.

Kisianni inuttamik allamik pisuutitsiniarsarineq ataqatigiissinnaanngilaq, unnerluussisoq Sigrid Friðjónsdóttir isumaqarpoq. Politiit aamma unnerluussisussaatitaasut inuup allap pinerluuteqarsimasinnaanera misissorluarsimagaat nassuiaavoq, tassanilu taamaattoqarsimanngitsoq paasisimagaat. Illuanik inuup ipaanik aamma assaat ipaannik takussutissat tamarmik unnerluunneqartumut tikkuussipput.

Taassumallu aamma Thomas Møller Olsenip nassuiaatini allanngortissimagaa, kiisalu arfininngornermi piffissami ullaakkut Birnap imaanut iginneqarnerata nalaani sumiissimanerminik nassuiaajumannginnera maluginiaqquaa.

Angajoqqaajusut sunnerteqqaqisut

Birnap angajoqqaavi sinnerlugit eqqartuussissuserisoq ikiorti Hanna Lára Helgadóttir eqqartuussivimmi najuuppoq. Angajoqqaajusut taamatut panimminnik peqqarniitsumik annaasaqarnerminnit sunnerteqqasorujussuusut, taassuma oqaluttuaraa. Eqqartuussivimmi suliarineqarnera aamma tusagassiorfinnit annertuumik sammineqarnerata ajoquseqqillugillu aliasunnerat annertusarsimagaat oqarpoq. Angajoqqaat sinnerlugit Hanna Lára Helgadóttir panimminnik annaasaqarnerminnut taarsiiffigineqarnissamik piumasaqaammik saqqummiussivoq.

Suliami eqqartuussisup tusagassiorfiit suliassanngortitseqqinnermit nalunaaruteqarnissaat killilersorsimavaa, nassuiaatit saqqummiunneqartut ilisimannittut tamarmik nassuiaateqareerpata aatsaat issuarneqarneqassammata.

Powered by Labrador CMS