"Inuppassuarnut toqqissisimanartoq" nalliuttorsiorpoq
Ukiut qulit matuma siornatigut Frelsens Hærip matuni siullerpaamik Nuummi ammarpai. Piffissap ingerlanerani tassaalersimavoq angerlarsimaffeqanngitsut amerlanersaasa ullormut ornittagaat.
Kaffiliorfiit ingerlaartuarput. Kaffimut nakkartitsiviit nutaamik taarserneqartuarput, kaffi qernarik nillujuitsumut kuineqarluni nerrivimmullu kaffisorfimmut ilineqarluni.
Aviisi Sermitsiaq taama allappoq.
Nuummi Frelsens Hærip iniutaanni pingasunngornermi ullaakkut nalunaaqutaq qulit qeqqarpoq. Ullakkorsiutit cornflakesit qorlortitallu akunnerup affaani iggaviup ammanerani sassaalliutaapput.
- Kumoorn, angut isertarfikkut iserluni oqarpoq.
Inuit piumasaminnik takkuttarlutillu aneqqittarput. Frelsens Hærimi nerisoqarsinnaavoq, aammali ataatsimoorluni sammisassaqartarluni soorlu nallukattarluni, internetterluni, pattalluni erinarsorlunilu. Sapaatit tamaasa ini issiavinnik ulikkaartarpoq, tassalu 33-nik, illup isuani naalagiartoqartillugu. Issiaviit ulikkaartuaannarput.
Ukioq manna ukiut qulit matuma siornatigut Frelsens Hæri Nuummi pisortatigoortumik ammarneqarpoq. Taamanikkulli ineriartortuarsimavoq ulluinnarni inuppassuarnut pingaaruteqalersimalluni.
- Isumaqarpunga ullaarli kaffekandit 20-issaat sanasimallugu, Nukannguaq Kleist ullormi tassani igaffimmiittussaasoq oqarpoq.
Sisimiunit kingoqqisuuvoq, ukiunili arlalissuarni Nuummi angerlarsimaffeqarani. Ullumikkut ilaannikkut Centrum Grillimi sulisarpoq, saniatigut Frelsens Hærip igaffiani kajumissutsiminik sulisarluni.
- Maanngartarnera iluaqutigisarpara, allanik ikiuineq inunnillu nerisitsineq nukissaqalersitsisarmat. Toqqissisimaqaagut, immitsinnut ilisarisimallutalu paarigatta, Nukannguaq Kleist oqarpoq.
Allaaserisaq tamaat Sermitsiami saqqummersumi kingullermi atuaruk, uani:
