Inunnut innarluutilinnut angerlarsimaffinni sulisut piginnaanngorsarneqassapput

Inunnut innarluutilinnut ulloq unnuarlu neqeroorutini sulisut perorsaasutut ilinniarsimasut ilinniaqqinnissaat pisariaqartinneqarpoq.

Taamaammat Naalakkersuisut ilinniaqqiffimmik perorsaanermik ilinniarsimasunut pilersitsinissamik sulissuteqarniarput. Inunnut innarluutilinnut nuna tamakkerlugu ulloq unnuarlu neqeroorutinut periusissami Naalakkersuisut allassimasaasa tamanna ilagaat.

- Suliatigut atortussaannik ilinniarteqqinnerisigullu sulisut sulinissaannut piareersartitsisarnitsinnut suli pitsaanerulissaagut, tamatumunngalu periusissaq sinaakkusiisuuvoq, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen oqarpoq.

Nunatsinni perorsaanermik ilinniagaq ataatsimoortumik ilinniagaammat aamma ilinniarsimasut inunnik isumaginninnermik immikkut ittumik sulinissamik naammattumik ilinniartinneqanngimmata, sulisunut ilinniareersimasunut ilinniartitseqqinnissaq pisariaqarpoq, periusissami oqaatigineqarpoq.

Ilinniarsimanngitsut immikkut ilisarititsisoqartassaaq

Inunnut innarluutilinnut ulloq unnuarlu neqeroorutini sulisut amerlanertigut ilinniagaqarneq ajorput. Nalinginnaasumillu sulisut taarserartorujussuuneranni sulisunut aalaakkaasunut sulisunik nutaanik najugaqartunut sullissinissamut tunngatillugu ilinniartitsiuarnerit piumasaqaateqartorujussuupput.

Naalakkersuisut oqarnerat naapertorlugu, sulisut nutaat suliassaqarfimmut ilisimasaqannginnertik pissutigalugu soraartartut ulloq unnuarlu neqeroorutini forstanderit misigisarpaat.

Sulisut nutaat ilinniarsimanngitsut immikkut suliassanik ilisaritsitsinermik ingerlatsisarnissaat, Naalakkersuisut periusissami siunniuppaat, tamanna internetikkut ingerlanneqarsinnaavoq.

Internetikkut pikkorissaanerit periarfissaatinneqartut

- Nunatta isorartunerujussua sulisut pikkorissartinniarlugit aallartinnissaannut akornutaasarpoq. Tamatumunnga pikkorissartitsinerit qarasaasiaq aqqutigalugu ingerlattarnissaat imaluunniit ilinniartitsinissanut atortut ineriartortinnissaat aaqqiissutaasinnaavoq, tamakkulu sulisut namminneerlutik paasisaqarfigissallugit periarfissaqarfigissavaat, Naalakkersuisut aaqqiissutissatut siunnersuummi allapput.

Piginnaanngorsaanissamik neqeroorutip ineriartortinneqarnissaa Isumaginninnermut Aqutsisoqarfiup aamma Pissassarfimmit kiisalu ulloq unnuarlu neqeroorutit akornanni suliarineqassaaq.