peqqissuuneq
Inunnut imminut toqunniarlutik eqqarsaatilinnut neqeroorutit amerlanerusut
Politiit isornartorsiuinerisa kingorna namminersorlutik oqartussat erseqqissarpaat imminut toquttarneq qaangerniarlugu iliuuseqartoqartoq
Inunnut imminut toqunniarlutik eqqarsaatilinnut sumiiffimmi neqeroorutinik pilersitsinissaq namminersorlutik oqartussat sulissutigaat.
Tamanna pivoq pikkorissarnermut najoqqutassiap Asist-ip siammarsarneratigut, taanna atorlugu inuit suliamik ilisimasallit innuttaasullu piginnaasallit imminut toqunnissamik ulorianartorsiortunut ikiueqqaarsinnaallutik.
Nukittunerusumik iliuuseqarnissaq ujartorpaat
Taamatut nalunaaruteqartoqarput Kalaallit Nunaanni Politiini chefpolitiinspektørip Hans Herluf Pedersenip imminut toquttartorpassuarnik ajornartorsiutip ilaatigut peqqinnissaqarfimmit nukittunerusumik iliuuseqartoqarnissaa ujartoreeraalu.
Ilinniarsimanngillat
– Ajornartorsiut iluamik qaangerniarneqassappat sakkortunerujussuarmik iliuuseqartoqassaaq. Ajornartorsiutip aaqqinnissaanut politiitut ilinniarsimanngilagut. Imminut toqunniartoq oqaloqatiginiaannarsinnaavarput napparsimmavimmullu tunniullugu. Taavali peqqinnissaqarfimmit malitseqartinneqassaaq, misigisimavungalu tamatigut taamaattoqarneq ajortoq, chefpolitiinspektøri TV-p aallakaatitassiaanut Kriminalmagasinet Station 2-mut oqarpoq.
Neqerooruteqarpoq
Naalakkersuisoqarfimmi pisortaagallartup Lone Nukaaraq Møllerip isornartorsiuineq tamanna isummerfiginngilaa, tikkuarluguli peqqinnissaqarfik ullumikkut inunnut, imminut toqoriarsimasunut, arlalinnik neqerooruteqartoq.
Psykologimik oqaloqatiginninnerit
– Tarnikkut nappaatilinnut immikkoortoqarfiup innersuussuteqarneq malillugu imminut toqoriarsimasut neqeroorfigisarpai nakkutiginissaanik aammalu tarnip nappaataanik ilisimasalimmik arfineq-pingasut angullugit oqaloqatiginnittarnissaannik. Telepsykiatri-p eqqunneqarneratigut neqeroorut aamma illoqarfinnut nunaqarfinnullu Nuup avataaniittunut atuutilersimavoq. Neqeroorut soqutigineqartorujussuuvoq, taamaasilluni aamma tarnip nappaataanik ilisimasalimmik atorfissaqartitsineq annertusiartorpoq, Lone Nukaaraq Møller oqaaseqaammini erseqqissaavoq.
Kisimiillutik anigorniarsinnaanngilaat
Taassuma ilanngullugu oqaatigaa politiit, kommunit imaluunniit peqqinnissaqarfiup imminut toquttarnermik ajornartorsiut kisimiillutik anigorniarsinnaanngikkaat.
– Pisariaqarpoq immikkoortut taakkua pingasut qanimut suleqatigiinnissaat, imminut toquttarnerit imminullu toqoriartarnerit ikilisarneqassappata, Lone Nukaaraq Møller erseqqissaavoq.
Naalakkersuisoqarfiup ilanngullugu tikkuarpaa aamma imminorsimasut qimataannut aammalu inunnut imminut toqunnissamik eqqarsaatilinnut neqerooruteqarnissaq pisariaqartinneqartorujussuusoq.