Inunnik Isumaginninnermik suliaqartut ernumassuteqartut

Inunnik isumaginninnermik suliaqartut peqatigiiffiata (Niisip) meeqqat inuusuttullu eqqortumik ikiorserneqarnissaat neriuutigaat.

- Ernumavugut ukiut taamannak ulloq unnuarlu angerlarsimaffinnik naalakkersuisoqarfimiit pilersitsiniarnermik pisussaaffeqartut iliuuseqarneq ajormata, meerartaqarpugut inuuniarlutik namminneq imminnut akissussaafigalutik inissisimalersimasut. Meeqqat inuusuttuaqqallu taakkuupput Namminersorlutik Oqartussat ulloq unnuarlu angerlarsimaffiutaanni inissaqartinneqanngitsut, ajoraluartumik aamma Kommune-t namminneq ulloq unnuarlu angerlarsimaffiuteqannginnertik pissutigalugu meeqqanut inuusuttunullu pineqartunut ikiorsiinissaminnut inorsaleqqasut, socialrådgiverit ulluanni marsip 16-ani tusagassiutinut nalunaarummi allapput.

Eqqortumik ikiorsiineq

- Ernumavugut ukiut taamannak inissiiffissaaleqineq qanoq iliuuseqarfigineqarneq ajormat., Niisip allappoq.

- Ulloq unnuarlu angerlarsimaffiit suli socialstyrelsemiit akuerineqanngitsut allaat inatsisinik unioqqutitsilluta atortarpavut akuersiniartarneq arriingaarmat, allanillu pilersitsiniaasaarneq arriingaarmat. Meeqqat siusissukkut inuuniarnermikkut sumiginnangaasimasut ima ilungersunartorsiortigaat ullumikkut ikiuutissat tulluarunnaarnikuullutik. Ikiuutissat tulluartut naleqquttullu amigaatigaavut, Niisip sinnerlugu siulittaasoq Ellen Magnussen allappoq.

Ulloq unnuarlu inissititserinermullu immikoortortaqarfimmit Karina Ivalo Kleistimit isornartorsiuineq ilumuunnginnerarneqarpoq.

- Kommunip akisussaaffigivaa meeqqat inuusuttullu ulloq unnuarlu paaqqinniffinnut inissanissaata tungaanut ikiorserneqarnissaminut pisariaqartitsisunut ikiorsiissutinik neqeroorfiginissaat. Ikiorsiineq pisinnaavoq misiliummik ikiorsiineq, ulloq unnuarlu paaqqinniffinnut tulluartumik inissaqalernissaasa tugaanut. Kommunep aalajagigassaraa misiligummi ikiorsiissutit aallartissanerlugit. Takkulu ikiorsiissutit Isumaginninnermik Aqutsisoqarfimmiit akuleruffigineqarsinnaanngilat, oqarpoq.

Inatsisit malinneqartut

Ulloq unnuarlu inissitsiterinermut immikkoortortaqarfik ulloq unnuarlu paqqinniffiit akuerisanut kommune-p innersuussai inissittaraat oqarpoq.

- Ulloq unnuarlu paaqqinniffiit nutaat akuerineqarnissaanut erseqqissaatigissavarput Isumaginninnermik Aqutsisoqarfimmiit inatsit, malinneqassammat. Taannalu Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat nr. 1, 25. januaari 2019-imeersoq toqqammaviliisuuvoq. Taannalu ulloq unnuarlu paaqqinniffinnut namminersortunut piumasaqaataammat qulakkeerneqassasoq.

lisimatitsissutigissavarput Isumaginninnermut Aqutsisoqarfimmiik ulloq unnuarlu paaqqinniffiit akuerineqanngitsut atorneqanngimmata.

- Ulloq unnuarlu paaqqinniffinnit namminersorlutik ingerlasut, pilersinniarneranni inatsisit avaqqunneqarsinnaanngimmat. Pilersitsinissaq sivitsorsinnaasarpoq inatsimmi maleruaqqusat tamakkiisumik qinnuteqartuniit naammassineqarsimatinnagit, Karina Ivalo Kleist oqarpoq.

Socialrådgiverit amigaatigineqartut

Avannaata Kommuniani kommunalbestyrelsimi qinigassanngortittup Sofie Dorthe Olsenip (IA) toqqaannartumik isumaginninnermi siunnersorteqannginneq uppernarsarpaa.

- Ilungersunartutut taaneqarsinnaavoq, isumaginninnermut siunnersortimik innuttaasunut toqqaannartumut sullissisoqannginnera. Tamannalu peqqutaalluni suliassat ilaqutariinnut tunngasut uninngasut qaassiioqaammita.

- Suliassammi imaanngitsut amerlaqaat soorlu; meeqqat inuusuttuaqqallu angerlarsimaffiup avataanut inissinneqarsimasut ima kisitsisitigut isikkoqarput; Ulloq unnuarlu angerlarsimaffimmut inissinneqarsimasut 40-50 akornaniillutik, ilaqutariinnilu paarsisartuniittut 70-t missaaniillutik, tusagassiutinut nalunaarummi allappoq.

Taamaattumik meeqqat inuusuttuararlu kisimik sullissassaanngitsut tikkuarpaa.

- Taakkununngali angajoqqaajusut pingaarnertut sullinneqartariaqarput, meeqqamut inuusuttuaqqamullu peqqinnarnerpaaq angussagutsigu, aammalu kommunemut akikinnerpaaq angussagutsigu ukiuni tulliuttuni. Angorusutarpullu tassaavoq angajoqqaanik sullissineq ataavartoq.

- Avannaata kommuniata isumaginninnermut siunnersortinik atorfinitsitsiniaanissani pikkoriffiginngilaa. Sulisut ulluinnarni atugaat eqqarsaatigalugit, soorlu ineqartinneqarneq tamanna maannamut pikkorluffigineqarpoq. Avannaata kommuniani politikkikkut aqutsilluarneq, tassa sulisunik atugarissaartitsisunik, ilinniarsimalluartunik suliinnartitsinissamut pingaartitsisunik aqutsisoqarnissaq pisariaqarpoq.

- Meqqat ilaqutariillu pineqartillugit kommunemut akisoorujussuusoq ilisimavarput, soorlu aningaasartuutit tassungaannaq tunngasut, 2019-mi takutippaa minnerpaamik 70 million ukiumut atorneqarsimasut. Tamatuma takutippaa politikkikkut aqutsineq qanoq eqarsimatigisoq, Sofie Dorthe Olsen oqarpoq.