Skip to main content

Inunnik isumaginninnermi siunnersortit sulinermi naammaginanngitsunik atugassaqartitaapput

Inunnik isumaginninnermi siunnersorti suliassanik 300-t angullugit amerlassusilinnik suliassaqarsinnaasarpoq. Inunnik isumaginninnermi siunnersortit qanoq suliassaqartiginerat tassuuna takutinneqarpoq, inunnik isumaginninnermi siunnersortit ilinniarsimasut peqatigiiffiata siulittaasortaava, Sara Abelsen, ilaasortaminut sulinermi atugassarititaasut pitsanngorsarneqarnissaannik piumasaqartoq, oqarpoq

Inunnik isumaginninnermi siunnersortit ilinniarsimasut peqatiigiiffiannut NIISIP-mut siulittaasunngortoq, Sara Abelsen, meeqqanut ilaqutariinnullu tunngasuni inunnik isumaginninnermi siunnersortinik sullissisunillu, suliassarpassuaqartunik sulinermilu naammaginanngitsunik atugassaqartitaasunik, ernummatiginnippoq.

- Inunnik isumaginninnermi siunnersortit meeqqanut ilaqutariinnullu tunngasunik ulluinnarni suliaqarnerminni annertuunik unammilligassaqarput. Suliassat assigiinngiiaartuupput nikerarsinnaallutillu pisariitsuniit ilungersunartunut pisariusunullu. Inunnik isumaginninnermi siunnersorti suliassanik 100-300-nik suliassaqarsinnaasarpoq. Tassuuna inunnik isumaginninnermi siunnersortit qanoq suliassatigut annertutigisumik tatineqarsimanerat takuneqarsinnaavoq, Sara Abelsen erseqqissaavoq.

Taassuma taarseraannerujussuaq uippakajaarnermik, qasusoornermik nappaatinillu uippakajaarnermut attuumassutilinnik nassataqarsinnaasumik, pissuteqartoq aamma innersuussutigaa.

- Tamanna inunnik isumaginninnermi siunnersortinut innuttaasunulluunniit mianerisariaqartunut, aaqqissuussaanermit torersumik sullinneqarnisamik pisinnaatitaaffeqartunut, iluaqutaanngilaq, Sara Abelsen erseqqissaavoq, isumaqarnerarlunilu isumaginninnermi ingerlatsivinni sulisut amerlineqartariaqartut.

- Sulisut qanoq amerlassuseqarnissaannik suliassatigullu piginnaanngorsarneqarnissamik apeqqutinut politikerit pingaarnersiuinerat aalajangiisuuvoq. Kisianni meeqqat isumaginninnikkut atugarliortut tamatumani pilliuteqartitaasarput, oqarpoq.

- Nalunaarutit iliuuseqarfigineqartanngippat tamanna akuersaarneqarsinnaanngilluinnassaaq, kisianni inunnik isumaginninnermi siunnersortit sullissisullu sulinermi naammaginanngilluinnartunik atugassaqartitaanerat erseqqissaatigisariaqarparput, atugassarititaasummi ima ajortigipput suliaminnik naammaginartumik isumaginnissinnaanatik, NIISIP-ip siulittaasua isumaqarpoq.

Suliassarpassuit naggaterpiaatigut inunnik inuuniarnerminni ilungersunartunik atugassaqareersunik eqquisarput, taamaattumik inunnik isumaginninnermi siunnersortit ilinniarsimasut peqatigiiffiat isumaqarpoq, partiit, naalakkersuisoqarfiit kommunillu kiisalu Kanukoka akimorlugit suliniutinik aallartitsisoqartariaqartoq, tusagassiorfinnut nalunaarummi oqaatigineqarpoq.

Taamaattumillu qitiusumiit siunnersuisoqartalernissaanik naalakkersuisup Martha Lund Olsenip ukioq manna marsimi tusagassiortunik katersortitsinerani saqqummiunneqartumik Naalakkersuisut pilersaaruteqarnerat inunnik isumaginninnermi siunnersortit ilinniarsimasut peqatigiiffiannit isumalluarnartutut isigineqarpoq.

NIISIP kommuninik nakkutilliilernissamik eqqarsaammut isumaqataavoq neriuutigalugulu tamanna suliassaqarfiup isiginiarneqarnerulerneranut suliassaqarfiullu aningaasaliiffigineqarneranut pissutaaqataassasoq. Siunnersuisarfimmik Qitiusumik pilersitsineq inunnik isumaginninnermi siunnersortit sullissisullu sulinerannut iluaqutaallunilu oqilisaataassaaq, Sara Abelsen naliliivoq isumaqarnerarlunilu, sulianik ingerlatsinerup nukittorsaavigineqarnissaa eqqarsaatigalugu pisoqartariaqartoq!

- Taamaattumik inunnik isumaginninnermi siunnersortit peqatigiiffianni isumaqarpugut Siunnersuisarfik Qitiusoq aallarniutitut suliniutitsialaassasoq, Sara Abelsen oqarpoq.  

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER