Inulerisut inuiaqatigiilerisullu suliniaqatigiiffiat pilersinneqartoq

Inuit inulerisut inuiaqatigiilerisullu, kiisalu inuit anguniagaqarusuttut suliniaqatigiiffimmik pilersitsillutik ataatsimeersuarngaaqqammerput. Suliniaqatigiiffik Inuisa, Kalaallit Nunaat, nunatsinnilu pissutsit pillugit ilisimasanik katersillunilu siammarterissaaq.

- Inuppassuaqarpoq nunatsinni pissutsinik ilisimasaqarluartunik. Soorlu nakorsaagunik, imaluunniit piniartuugunik, tamarmik ilisimasaqarput avitseqatigiissutigisinnaasaminnik. Ilisimasat taakku katersorusuppagut, nittarsaaffissamillu pilersitsissaagut pissutsit pillugit ilisimasat katersorneqarfissaannik, siulittaasunngortoq Markus E. Olsen oqarpoq.

Markus E. Olsen nassuiaavoq suliniaqatigiiffiliornissamut isuma aallartissimasoq Tasiilami inunnik isumaginnittoqarfimmi suliat uninngaannartut pillugit danskit nutaarsiassaqartitsiviat qaqilerereersorlu. Inunnik isumaginnittoqarfimmi suliat uninngaannartut qulaarneqarnerisa kingorna danskit naalakkersuisui ilisimatitsipput Kalaallit Nunaannut aningaasanik 80 milliuunit koruuninik ukiuni sisamani tullerni tapiiniarlutik.

- Sooq kalaallit nammineersinnaanngillat? Ajornartorsiutit aaqqinnissaannut piumassuseqartoqarpugut, soorlu Tasiilami suliat aamma pillugit. Soorunami avataaniit ikiorneqarsinnaavugut, kisianni nunap iluani ilisimasallit aamma atorluarsinnaasariaqarpagut. Uagut kulturikkut ilisimasarput itinerusumik ilisimasaqartutut inissisimanerput aallaaviummat sulinitini Nunatta iluani ilisimasallit atorluartariaqarpagut, avataaniit ikiorneqaannarata. Nittarsaaffimmik pilersitsissaagut, qulaajarneqarniassammat suliani suniluunniit qanoq ilisimasallit amerlatigisut piginerigut, Markus E. Olsen oqarpoq.

Suliat akimorlugit sulineq

Taassuma ilanngullugu nassuiarpaa kikkut tamarmik suliniaqatigiiffimmut tikilluaqqusaasut. Suliniaqatigiiffimmi suliat akimorlugit suleqatigiinneq qitiulluinnarpoq, ilisimasat tunniunneqartut tamanut ingerlateqqinneqarsinnaaniassammata. Suliniaqatigiiffik ilanngullugu tusagassiiviliorusuppoq, ilisimasat siammarneroqqullugit.

- Inulerisunut, psykologinut, inuiaqatigiilerisunut, suliaqartunullu allanut kiisalu misilittagalinnut ataatsimoorfeqassaaq. Kikkut tamarmik ilisimasaqarput misilittagaqarlutillu, taakkulu uagut atorluarsinnaavagut, oqarpoq.

Inuisap pingaartitaasa ilagaat tamanut oqallitsitsisarnissaq. Siulersuisuunerit ukioq nutaamiit oqallitsitseqqinnissaminnut piareersimasuuteqalereerput.

Inuisap oqartussat kaammattorpai aalajangiisoqassatillugu peqatigiiffik suliat akimorlugit suleqatigiinnermik aallaaveqartoq tusarniarneqartassasoq.

Siulersuisunngortut aajuku:

• Siulittaasoq: Markus E. Olsen
• Aningaaserisoq: Luvisa Kristiansen
• Allatsi: Gorm G. Vold

Siulersuisuni ilaasortat:

• Moses Masik
• Karen Marie Nathansen

Sinniisut:

• Siila G. Vold
• Christian P. Jerimiassen