Inuk utoqqaliarsaartoq Coronaqarluni toqukkut qimagussimavoq
Inuk ataaseq Aappilattumeersoq Covid-19-imik tunillatsissimasoq toqukkut qimagussimavoq. Coronali toqussutigisimanngilaa, toquneranulli sunniuteqaqataasinnaasimassasoq ilimagineqarluni.
Nun.gl-imi coronap ataasinngornermi paasissutissiissutigineqarnerani atuarneqarsinnaavoq, inuk alla coronaqarluni toqukkut qimagussimasoq.
- Kisitsisinik kingullermik nutarterisoqarmalli inuk utoqqaliarsaartoq Aapilattumeersoq antigentest atorlugu misissorneqarnermi kingorna ullut 30-t suli qaangiutinngitsut toqukkut qimagussimavoq. COVID-19 toquneranut pissutaasimanngitsoq nalilerneqarpoq, coronali toquneranut sunniuteqaqataasimasinnaasoq oqaatigineqarluni, nakorsaaneqarfik allappoq.
Nunami tamarmi PCR atorlugu misissortissimasut 67-it pillugit akissutit tallimanngornermi, arfininngornermi sapaammilu tiguneqarsimapput, taakkunannga 15-it (22%) tunillatsissimallutik.
COVID-19-imut atatillugu napparsimmavinnut unitsinneqarsimasut amerlassusaat kingullermik nutarterisoqarmalli allannguuteqarsimanngillat. Ataasinngornermi martsip 21-ani nal. ualikkut pingasunut Nanortalimmi uninngasut suli pingasuupput, nuna tamakkerlugu COVID-19-eqarlutik uninngasutuaallutik. Taakku pingasuullutik allamik pissuteqartumik unitsinneqarsimapput, tassa unitsinneqarnerannut COVID pissutaasimanani.