INUK nutaamik saqqummersitsilerpoq
Nipilersortartut INUK album "Ajorsartitaasoq" sisamanngorpat 4. november saqqummersilerpaa. Album nipilersoqatigiit sisamassaattut saqqummersitassaraat.
INUK novemberip sisamaani sisamassaanik saqqummersitsisussanngorpoq.
Tusagassiorfinnut nalunaarutigineqarpoq album saqqummersussami erinnat imminut toqunnissamut eqqarsaatinut, asasanik annaasaqarnermut, ningarnermut sangiattarnermullu, kiisalu neriunnermut asanninnermullu tunngasuusut.
Saqqummersinneqareersuniillu siullernut sanilliullugu saqqummersussaq rockiunerussasoq, ilisimatitsissutigineqarpoq.
Nipilersortartut namminneerlutik maanna saqqummersitsisuussapput.
- Albumini kingullerni marlunni, Aanngalerneq aamma Qalipaatit INUK, Atlantic Music suleqatigilluareerlugu aalajangerpugut nammineerluta immiussillutalu saqqummersitsiniarluta. Ukiullu affaa immiussereerluta ”Ajorsartitaasoq” saqqummertussanngorpoq, aallaqqaammut erinnat aqqanillut digitaliusumik. Kingusinnerusukkullu CD aamma LP saqqummerumaarlutik, Inunnguaq Petrussen tusagassiorfinnut nalunaaruteqarluni ilisimatitsivoq.
Album pitsaanerpaaq
Album ”Ajorsartitaasoq” inuunermi oqimaatsut ajorsarfiillu pillugit erinnanik imaqartoq, nipilersoqatigiit ilisimatitsipput. Immiussinermi Kofoeds Skole qanimut suleqatigineqarpoq, aammalu erinnami ataatsimi Kofo Kor immiusseqataatinneqarsimallutik.
- Misigivugut aatsaat taamak torrallaatigaluta. Qilanaarluinnarpugut erinnat nutaat tamanut tusaatissinnaalissallugit, qilanaarpugullu peqqikkutta tusarnaartitsinerni atortalernissaannut, Inunnguaq Petrussen oqarpoq.
Taalliortuupput erinniortuullutillu qatanngutigiit Inunnguaq Petrussen aamma Gustav Lynge Petrussen. Nipilersortartuni basertuuvoq Kristian Herlufsen Jens Christian Lyberth Lennertilu trommertuulluni.
Albummit marluk siulliit, Aanngalerneq 2015-imeersoq aamma Qalipaatit 2018-imeersoq tamarmik 3.000 sinnerlugit tunisaasimapput.