Inuk malunnaatilik 75-inik ukioqalersoq
Politikkeriullunilu atuakkiortoq Aqqaluk Lynge inuit pisinnaatitaaffiinik nunarsuup annersaani sorsuuteqarsimavoq. 2018-imi soraarninngorpoq suliaarussimanananili.
Kalaallit Nunaanni inuit malunnaateqarnerpaat ilagisaat 75-inik ukioqalerpoq.
Aqqaluk Lynge ukiorpassuit ingerlaneranni inuiaqatigiinnut sunniuteqarsimaqaaq. Oqallissaarisartutut, politikkeritut partiimillu pilersitsisutut, aammali nunani tamalaani pisinnaatitaaffinnik sorsuuteqartartutut, inunnik siulersuisutut minnerunngitsumillu atuakkiortutut, tassani Kalaallit Nunaata namminersulivinnissaa danmarmimullu atassuteqarneq sammineqarluartarsimallutik.
Sunniuteqarfigisimasai amerlaqaat. Sunniuteqartarnera 1976-imi Københavnimi isumaginninnermi siunnersortitit ilinniakkaminik naammassinninnerani aallartippoq.
Kalaallit Nunaata Gandhia
Aqqaluk Lynge 2018-imi soraarninngorpoq. Soraarninngornissami tungaanut Inuit Circumpolar Councilimi (ICC) siuttunut ilaasimavoq. Ukiut amerlanersaanni kattuffimmi præsidentiusimavoq, kattuffik inunnik Kalaallit Nunaanneersunik, Canadameersunik, USA-meersunik Ruslandimeersunillu 180.000-inik sullissisuuvoq.
Kattuffimmi suliaqarnerminut atatillugu Mahatma Gandhi-mut Martin Luther King-imullu assersuunneqarsimavoq, tassani sorsunnertaqanngitsumik inuit pisinnaatitaaffiinik uteriilluni sorsuuteqartarnini tunngavigalugit.
Lynge suliarpassuarminut atatillugu nersorneqartarsimavoq. Kingullermik 20221-mi Ilisimatusarfimmi ataqqinaammik doktorinngortinneqarluni.
Aqqaluk Lynge ukiut 40-t sinnerlugit Nuummi najugaqarsimavoq, nuliani Erna Lynge 70-inik ukiulik najugaqatigalugu. Aappariit pingasunik qitornaqarput sisamanillu erngutaqarlutik.
Soraarninngorsimagaluarluni, Kristeligt Dagblad naapertorlugu - ernguttami peqatigisarnerisa saniatigut - atuakkiortutut kalaallisullu atuagassiami Kalaalermi ulapputeqarpoq.
Inuusunnerusunut ilisimatitsissuteqartartoq
Qaammaammut ataasiarluni KNR-kkut aallakaatitsisarpoq, tassani nuna nunallu oqaluttuassartaa pillugit inuusunnerusunut ilisimatitsissuteqartarluni:
- Pingaartumik nunasiaataasimaneq inuttut ilisimasaqarfigisariaqarparput, qanga kukkussutaasimasut uteqqinnginniassagatsigit, ilaatigut Kristeligt Dagblad-imut taamatut oqarsimavoq.
Tassani ilaatigut illoqarfittut aamarsuarsiorfiup Qullissat matuneqarnerata innuttaasunut annernaqisumik kingunerluuteqarsimanera innersuussutigalugu.
Matusineq ukiut 50-it matuma siornatigut pivoq. Aqqaluk Lynge taamanikkut aasaanerani illoqarfimmiippoq. Ilaatigut Per Kirkeby peqatigalugu taamanikkut pisoq filmiliarisimavaat, qulequtserlugu: ”Da myndighederne sagde stop”.
Filmi sapaatip-akunnerata naanerani Nuummi Katuami takutinneqarpoq, tassani aamma Aqqaluk Lyngep Teit Jørgensenillu atuakkiaat taamatut aamma qulequtalik saqqummiunneqarluni.