Inuk Hostels nutaamik pisortaanertaartoq
Piginneqataasoq Maren-Louise P. Kristensen Liisi Egede Hegelund taarserlugu pisortaaninngorpoq
Nuummi Inuk Hostelsimik piginnittut marluk inissisimanerminnik paarlaapput.
Liise Egede Hegelund 67-inik ukiulik ukiuni tallimani qaammatinilu arfinilinni pisortaanioreerluni piginneqatiminut Maren-Louise P. Kristensenimut 34-nik ukiulimmut atuuffini maanna tunniuppaa.
– Ukiorpassuarni takornariartitsisarnermik suliaqareerlunga siorna aggustusip qaammataani aalajangerpunga, pisortatut ingerlatsineq Inuk Hostelsimik piginneqatinnut inuusuttumut Maren-Louise P. Kristensenimut tunniutissallugu piffissanngortoq. Ukiuni marlunni Maren Louisemut siunnersortitut atuussimavunga. Taamaammat Inuk Hostelsimik aqutsineq ukiumi nutaami januaarip aallaqqaataaniit Marlomut tunniussinnaagakku naammagisimaarinnillungalu nuannaarpunga. Nukiit nutaat isumassarsiallu nutaat imminnut malinnaatinneqartussaapput, Liisi Egede Hegelund oqarpoq.
Nutaanillu isumassarsiorsinnaaneq pisortaaninngorlaamut nutaajunngilaq.
- Anu Una aallartikkakku qulartorpassuaqarsimavoq. Kalaallisut oqaasilinnut atuagassiaq inuussutissarsiutaasinnaanersoq arlaannaataluunniit upperisimanngilaa, ullumikkulli suli atuagassiaq atuuppoq. 2016-imi takornariartitsinermik suliaqartunut akuulernissara pillugu isummat nutaat takkussuussimapput. Siusinnerusukkut timmisartumi saqisuusimavunga, taamaammat tamakku tungaasigut eqqarsaasersortarneq uannut nutaajuallaanngilaq, Maren-Louise P. Kristensen oqarpoq.
- Kulturitta kinguaariinnut tullernut takornarianullu takutinneqarnissaa pingaarutilipilussuuvoq. Suliffeqarfimmi periarfissaqartoq takusinnaavara. Mannatut ittumik nunarsuarmi allami takussutissasaqanngilaq, Maren-Louise oqarpoq, assersuutitullu innersuussutigalugu illuaqqat unnuisarfiusut uumasunik sisamanik aallaaveqartumik aaqqissuunneqarsimasut. Soorlu Nanu nanoq isumassarsiorfigalugu aaqqissuunneqarsimasoq, ilaatigullu nannup amianik pisatsersorneqarsimasoq.
- Takkuttartut naatsorsuutigisinnaavaat, suliffeqarfiup taamatut anersaaqarluni ingerlatiinnarneqarnissaa. Piumassuseqaraanni takorluukkamik piviusunngortitsisoqarsinnaasoq takutissallugu pingaartittuaannarsimavara. Naatsorsuutigaarput takornariat amerlanerit kulturimik inunnilllu takusaqarusullutik nunatsinnut tikittalissasut. Nunatsinnillu takutitseqataasuppunga, Maren-Louise P. Kristensen oqarpoq.
Liisi Egede Hegelund suliffeqarfimmi suleqataasutut siunnersortitullu atuutiinnassaaq.
- Ukiuni 35-ni takornariartitsinermik suliaqarsimavunga. Aallarnisaasutut Kalaallit Nunaanni illoqarfinni angisuuni marlunni, Sisimiuni Nuummilu, takornariartitsisarneq siuarsaaqataaffigisimavara, Liisi Egede Hegelund oqarpoq.
- Greenland Tourismip (ullumikkut Visit Greenland) aallartisarneqarnera aallaqqaataaniit peqataaffigisimavara, takornariartitsisarnerup ineriartortinneqarnera pillugu atuakkiorsimavunga kiisalu Kalaallit Nunaanni takornariarfiusinnaasut kalaallisut danskisullu takusassiaralugit suliarisimallugit. Takornariartitsisarnerup ineriartortinneqarnerani kulturi Kalaallit Nunaanni takornariartitsinermik ineriartortitsillunga suliaqartarninni qitiutittuaannarsimavara.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...