Inuk ataaseq timmisartumik Nunatsinnukarnermini toqusimasoq
Politiit pingasunngornermi timmisartup Kalaallit Nunaannukarnerani toqusoqarsimasoq uppernarsarpaat.
Ilanngutassiaq Air Greenlandip oqaaseqaataanik ilanngussilluni nutarterneqarpoq.
Timmisartup pingasunngornermi Københavnimiit Kangerlussuarmukarnerani ilaasoq ataaseq toqusimavoq.
Pigaartut pisortaata Preben Kleistip oqaluttuaraa, toqusup ilaqutai nalunaarfigineqarsimasut.
Politiit pisimasumik suli misissuipput, taamaammallu maannakkorpiaq allanik oqaaseqarsinnaanaik, pigaartut pisortaat nassuiaavoq.
Air Greenlandimit Sermitsiaq.AG-mut ilisimatitsissutigineqarpoq, timmisartup attartukkap Hi Fly-fly-p Københavnimiit Kangerlussuarmukarnerani toqusoqarsimasoq.
Norsaq marlunngornermi sila pissutigalugu Kangerlussuarmut missinnaasimanngimmat, timmisartoq attartorneqarsimavoq. Taamaammat pingasunngornermi marloriarluni Københavnimiit Kangerlussuarmukartoqarsimalluni.
Air Greenlandimit ilanngullugu ilisimatitsissutigineqarpoq, toqusoqarneranut atatillugu suliaqaqataasimasut ikiorserneqarnissaat aallartinneqarsimasoq, suliarlu oqartussanut tunniunneqarsimasoq.