Inuk ataaseq alla coronamik tunillatsissimavoq
Inuk ataaseq alla coronamik tunillatsissimasoq nassaarineqarpoq, taamalu Kalaallit Nunaanni inuit marluk peqqisseqqereerneranni, tunillatsissimasut maanna inuit pingasunngorlutik
- Tunillatsissimasooq Nuummiipppoq, Kim Kielsen ilisimatitsivoq.
Nunatsinni Nakorsaanerup Henrik L. Hansenip skypekkut oqaluttuaraa, nutaamik tunillatsittoqarnissaa naatsorsuutigineqareersimasoq, inummi tunillatsittoq kingulleq, sapaatiummat tunillatsissimasumut ilaqutaammat. Taakku marluullutik maanna angerlarsimaffimminni mattuteqqapput.
- Inuit 265-it misissugassanik tigusiffigisimavanut, arlallillu akissutisinissaat utaqqimaarlutigit, Henrik L. Hansen oqaluttuarpoq.
- Inuppassuit aperisarpaatigut qanoq inissisimanersugut, tuniluunnermi sukkulluunniit takkussinnaammat. Pingaaruteqarporli tunillatsissimasut amerlanerulernaveersaartinneqarnissaat. Aasap qanilliartornerani tunillatsissimasut amerlinaveersaartikkutsigit, periarfissaqalissaagut tunillatsissimasunik nammineerluta isumaginninnissamut, Nunatsinni Nakorsaaneq nassuiaavoq, innersuussutigalugulu Danmarkimi coronamik nappaateqartoqalersimaneranik artukkiisoqarnerani, nunatsinni tunillatsittut amerlanerulinnginnissaat pingaaruteqartoq.
Tunillatsissimasoq suliakkersuutaanngitsoq
Politimesteri Bjørn Tegner Bay nutaanik oqaluttuassaqarpallaanngilaq, ullumimi nalunaaruteqarnermut atatillugu nutaarsiassaqarpallaanngimmat.
- Tunillatsissimasoq nutaaq politiinit eqqumaffigineqarpoq, tassami pineqartup ilagisimasaanik ujaasisoqartariaqarsimanngimmat, Bjørn Tegner Bay ilisimatitsivoq.
Danmarkimi atuarfinnik, pisiniarfinnik il.il. matoqqatitsineq apriilip 13-iata tungaanut sivitsorneqarsimavoq.
Politimesterp ilisimatitsissutigaa, timmisartoqqusinnginneq apriilip arfineq-pingajuata tungaanut attuuttoq, ullorlu taanna ullunik marlunnik sioqqullugu aatsaat sivitsuisoqassanersoq isummerfigineqarumaartoq.
Inatsisartut katersuutsinneqassasut
Naalakkersuisut Inatsisartunik katersuutsitserusupput.
- Inatsisartut Siulittaasoqarfianut allagaqarsimavugut, tassani Inatsisartuni ilaasortat ikinnerpaamik 16-it aggersarneqarsinnaanerannut periarfissarsiorluta, tassa inatsisiliorsinnaalersilluta, Kim Kielsen ilisimatitsivoq.