Inuit tunillatsissinnaagaluarlutik pisiniarfinni katersuussimasut
Inuit aningaasarsigaangata pisiniarfinni aningaasanillu tigusisarfinni tulleriiaattunnguaqartarpoq, imminullu qanippallaannginnissamik pisortat kammattuuteqaraluartut, ippassaq unnukkut taamatut inuppassuaqarpoq.
Videomi Facebookikkut inunnit 300-t sinnerlugit amerlassusilinnit takuneqareersimasumi, Pisiffik Nuup illoqarfiata qeqqaniittoq inunnik ulikkaavissoq takuneqarsinnaavoq, to meterisut imminut ungasitsiginissamik inassuteqaat malinneqanngivilluni inuit tulleriaattut takuneqarsinnaalluni.
Pisiffik Sermitsiaq.AG-mut ilisimatitsivoq, sulisunik amigaateqarneq pissutigalugu, inupaassuit pisiniarfimmut isaasut unitsinneqarsinnaasimanngitsut.
- Ippassaq pigaartuusartoq takkutinngitsoorpoq, ajoraluartumillu pisiniat imminnut qanillivallaannginnissaat eqqumaffigineqarpallaarsimanngilaq, Pisiffimmi ingerlatsinermut pisortaagallartoq Súsanna Poulsen oqarpoq.
Videomut tunngatillugu oqaaseqartunit arlalinnit siunnersuutigineqarpoq, tuniluuttoqarsinnaanera pinngitsoortinniarlugu pisiniarfik matuneqartariaqartoq, innuttaasorlu ataaseq politiinut pisoq pillugu saaffiginnissimalluni, qanorli iliuuseqarsinnaanerat killeqartoq, oqaatigineqarsimavoq.
Politiit inunnik pinngitsaaliillutik aniatitsisinnaanngitsut
Katersuunnissamut inerteqqussut, inuit amerlanerpaamik quliullutik aatsaat katersuussinnaatitaaffiat pisiniarfinnut, suliffeqarfinnut, ataatsimoortunik angallassisartunut angerlarsimaffinnullu atuutinngilaq.
Politiit taamaammat inuit imminnut qanillivallaannginnissamik inassuteqaammik malinninnginnerat pissutigalugu, pinngitsaalillugit anisinnissaannut piginnaatitaanngillat. Akerlianik pisiniarfiup silataani avissaartuutsitsinissamut piginnaatinneqarput, politiit Sermitsiaq.AG-mut nassuiaapput.
Politiit ilisimatitsissutigaat, pisoq pillugu ippassaq unnuap qeqqalivissoq inummit ataatsimit nalunaarfigineqarlutik, Pisiffimmi pisiniarfiullu silataani inuppassuit imminnut qanittunnguullutik nikorfarrattut. Vicepolitiinspektøri Sebastian Bech oqaluttuarpoq, pisoq sapinngisamik pisussaaffiit malillugit isumagineqartoq.
- Ippassaq nalunaarfigineqaratta politiit biiliat ataaseq Pisiffimmukartipparput. Inuit silataaniittut susassaqaratillu uninngasut qimaguteqquagut. Pisiniarfimmi sulisut oqaloqatigalugit, inuillu qanoq imminnut ungasitsigalutik nikorfasarnissaannut ikiuuttartusssamik pigaartoqartarnissamik ilitsersuullugit, taanna oqarpoq.
Taamatut pisoqaqqissinnaanera pinngitsoortinniaraa
Pisiffimmi ajornartorsiut aaqqiiffiginiarlugu suliaqartoqarpoq, Súsanna Poulsen oqarpoq.
- Tamanna eqqumaffigaarput, pigaartorisartakkavut suleqativullu peqatigalugit ullaaq manna pilersaarusiorpugut, nalunaaquttap akunnermusiallit sisamanngornikkut unnukkut isaasarnerat eqqarsaatigalugu siunissami tamanna qanoq isumagisassanerlugu pilersaarusiorluta, ingerlatsinermi pisortaq oqarpoq.
Tamatuma saniatigut pisiniat qinnuigai akisussaaffimmik tiguseqqullugit.
- Pisiniartartuvut kaammattorpagut, oqartussat inassuteqaataannik malinneqqullugit, aamma pisiniarfitsinniikkaangamik imminnut qanippallaartassanngitsut, Súsanna Poulsen oqarpoq.