Inuit tapersersortaat Canadami guvernørgeneralinngortinneqartoq
Canadamioq Inullu Mary Simon nunami nunap inoqqaavi pillugit ukiorpassuarni sorsuuteqartartutut aqutsisutullu ilisimaneqartuuvoq. Ataasinngormat nunap inoqqaavinit siullersaalluni guvernørgeneralitut ivertinneqarpoq.
- Isumaqarpunga saammaasseqatigiittarneq inooriaasiusoq, Mary Simon Canadami gunernørit 30-issaattut pisortatigoortumik ivertinneqarami oqarpoq. Inuk-tut siullersaalluni guvernørinngortinneqarpoq. Canadamiut inuppalaartuunerat nersualaarpaa, neriorsuutigalugulu inuit ataatsimoortilerniarlugit, CBC News allappoq.
Guvernørgeneral Canadami immikkut atuuffiuvoq, guvernøri kunngimit nunami aallartitatut atuuffiuvoq - matumani Dronning Elisabethimit.
Mary Simon maanna najugaqarfigilingassaminit ungasissupilussuarmi inunngorlunilu alliartorsimavoq, neriorsuutigaalu Canadami innuttaasut tamaasa sullinniarlugit.
- Canadamiut nunatta periarfissaqarnera pillugu nutaamik misigissuseqarlutik oqartartut tusartarpara, neriuutigaaralu inuit ataatsimoortilersinnaassallugit, taanna ataasinngormat pisortatigoortumik guvernørgeneralinngortinneqarami oqarpoq.
Canada Simonitut ittumik pisariaqartitsisoq
Mary Simonip inuit ataatsimoortiliinnarusunngilai, aamma neriorsuutigaa silap pissusaata allanngoriartorneranut akiuiniarluni, tarnikkut peqqissuunissaq ilungersuutiginiarpaa nunallu inoqqaavisa Canadamilu innuttaasut allat saammaateqatigiinnissaat aamma sulissutiginiarpaa.
Premierministerip Justin Trudeau-ip guvernørgeneralinngorlaaq tuulluussimaarutigaa:
- Aqutsisuulluarnermi inuit eqqanniittut qanoq iliuuseqarfigineritit nalilersorneqassaaq. Kikkut tamarmik qaamasumik siunissaqartinniarlugit piginnaasatit nalilersorneqassapput, tassa iluatsitsilluartuinnaat pinnagit, premierministeri Canadap oqaluttuarisaanerani aatsaat pisoq pillugu oqarpoq.
Mary Simon Nunavimmi nunaqarfimmi Kuujjuarmeersuuvoq, kattuffiillu Canadami nunap inoqqaavi pillugi qitiusumik sulissuteqartartut arlallit aquttuuffigisarsimavai, soorlu ICC, Makivik Corp aamma Inuit Tapiriit Kanatami.