Inuit tallimat tillinniartoqarsimaneranik suliami unnerluutigineqartut
Nuummi tillinniartoqartarsimaneranut atatillugu inuk ataaseq tigummigallagassanngortinneqarsimavoq, inuillu katillugit tallimat unnerluutigineqarsimallutik.
Politiit illoqarfiit pingaarnersaanni tillinniartoqarsimaneranik sapaatip akunnerani matuamni arlaleriarlutik nalunaarfigineqartarsimapput. Politiit sisamanngornerup unnuaani tillinniartoqarsimaneranik sisamariarlutik ullullu ingerlanerani arlaleriarlutik nalunaarfigineqarsimapput.
Misissuisimanermut atatillugu inuit katillugit tallimat maanna unnerluutigineqarsimapput.
unnerluutigineqartut ilaat ataaseq tallimanngornermi eqqartuussivimi killisiorneqareersluni novembarip aallartinneranut tigummigallagassanngortinneqarsimavoq, pigaartut pisortaat Søren Bendtsen Sermitsiaq.AG-mut ilisimatitsivoq.
- Tillitat ilarpassui pissarsiarisimavaut. Taakku suliami uppernarsaatitut atorneqassapput, tamatumalu kingorna piginnittunut utertinneqassallutik.
- Tuniniaruminartut, soorlu elektroniskiusut, sanalukkat, pinnersaatit imigassallu internetsikkut tuniniarneqarsinnaasut matumani pineqarnerupput, Søren Bendtsen oqaluttuarpoq.
Ilumoorsinnaanngitsut?
Tillitat inuinnaat angerlarsimaffiannit tillitaapput, pigaartullu pisortaata innuttaasunut kaammattuutigalugu oqaatigaa:
- Matup silarliup parnaarneqartarnissaa eqqaamallugu. Tillinniaq matup tigummivia tiguinnarlugu inimut isersinnaasarpat, tillinniarnerpassuit ajornanngitsumik pisassapput, Søren Bendtsen oqarpoq.
Aamma inuit eqqaamiuminnik nakkutiginninnissaanik kiisalu nioqqutissanik akikittuaranngorlugit tuniniarneqartunik pisitinnatik eqqarsarluaqqaartarnissaannik kaammattorpai:
- Internetsikkut pisiaqarnermi ilumoortuusinnaanersoq eqqarsaatigeqquneqarpoq. Tuniniaasup tuniniakkami tillitaannginneranik uppernarsaasarnissaa piumasarineqarsinnaavoq.
- Akuliutsinneqassagutta tillitanik pisiaqarsimasutut unnerluussaasoqarsinnaavoq, Søren Bendtsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...