Inuit tallimat Ejnar Mikkelsenimit annaanniarneqartariaqarsimasut

Inuit tallimat Aasiaat Kangaatsiallu akornanni Nassuttuumiittut Arktisk Kommandop nakkutilliissutaannik annaakkiartorneqartariaqarsimapput, angallataat sikumit ingerlariaqqinnaveermata.

Umiatsiaaqqat pingasuusut, katillugit tallimanik inuttaqartut immap sikuuneranit ingerlariarnaveeramik Aasiaat radioa aqqutigalugu ikioqqullutik ippassaq unnukkut nalunaaqutaq 22.00 missaani kalerrisaaripput. Annaassiniaallunilu ujaasineq aallartinneqarluni.

- Inuit tallimat Nassuttuumiissimapput, Aasiaat kujataanni. Immap sikuunera pissutigalugu umiatsiaaqqat ingerlariaqqinnaveersimapput. Ataaserlu umiatsiat kaanngartinniarneranni imaanut isissimalluni. Isittoq nunamut qaqisinnaasimavoq, Kalaallit Nunaata Politiivini pigaartut pisortaat Malik Olesen Sermitsiaq.AG-mut oqaluttuarpoq.

Arktisk Kommandop nakkutilliiartorluni angallataa Ejnar Mikkelsen, kalerrisaarinerup nalaani Qasigiannguit eqqaanniissimasoq erngerluni Nassuttuup tungaanut aallarpoq ikiuukkiartorluni.

Unnuillutik utaqqisariaqartut

Nakkutilliiartortitaq Ejnar Mikkelsen kalerrisaarinerup nalaani Qasigiannguit ungasinngisaanniikkami sivisungaatsiartumik Nassuttuup tungaanut ingerlaarsimavoq. Inuit tallimat Nassuttuumi nikeriaqqinneq ajulersut unnuaq naallugu utaqqisariaqarsimapput.

- Inuit pineqartut tallimat Arktisk Kommandop angallataanut tamarmik ullaaq nalunaaqutaq 8.30 missaani ikisinneqarput. Tamarmik ajunngillat. Ataaserli nakorsamit misissorneqartariaqartussaasoq naatsorsuutigaarput, imaanut isinnerminit timaa nilloriartupallassimanera pissutigalugu, Malik Olesen oqarpoq.

Ejnar Mikkelsen maanna Sisimiut tungaanut ingerlaarpoq, annaanneqartullu peqqinnissaqarfimmit misissorneqassallutik.

Powered by Labrador CMS