puisinniartarneq
Inuit Sila Issittumi nunani aamma paasititsiniaarusuppoq
Ataatsimoorutta nukittunerussaagut, Inuit Silamit Leif Fontaine aamma Canadami Iqalunni piniartoq Aaju Peter oqarput
Puisinniartarnermut illersuiniaqatigiiffiup Inuit Sila Københavnimi allaffeqarfeqarpoq. Issittumi aamma allaffeqarfeqalernissani anguniagarilerpaa.
Canadami allaffeqarfeqalernissaa suliniutigineqaleruttorpoq. Inatsisitigut kattuffinngorsinnaanerali suliarineqaqqaartariaqarpoq. Nunani tamalaani sulisinnaanissani anguniagarilerniarpaa.
- Issittumi puisinniartartut sullinneqarnissaat Inuit Silamit aallaqqaataaniilli sulissutigineqarpoq. Tamarmimmi EU-mit eqqorneqarput. Canadap puisip amianik EU-mut tunisassiornera Kalaallit Nunaannit annikinnerugaluartoq eqqorneqarnerat assigaat, Kalaallit Nunaanni Inuit Silap oqaaseqartartua Leif Fontaine oqarpoq.
Oqaaserineqartut Aaju Peterp Canadameersup taperserpai.
- Uani suliami suleqatigiittariaqarpugut. Issittumi innuttaasut tamarmik suleqatigiittariaqarput. Puisinniartarnermummi akerliuniartut ukiuni kingullerni 40-ni takussaapput, taakkulu uagutsinnut eqquipput, Aaju Peter oqarpoq.
Ataatsimoorutta nukittunerussaagut
- Ataatsimut suleqatigiikkutta nunanit tamalaanit tusaaneqarnerussaagut. Issittumi immitsinnut paasissutissanik immersueqatigiinnerusalertariaqarpugut, Aaju Peter oqarpoq.
Inuit Silap Strasbourgimiinneranni peqataapput.
- Europamiut soqutiginninnerat aatsaat takuara. Politikkerit inuillu una suliaq pillugu paasisaqarusuttorujussuupput, tamanna alloriarneruvoq pitsaasoq, Aaju Peter oqarpoq.
Akerliussutsimik takutitsineq
Eqqissisimasumik akerliussutsimik takutitsisoqarnera Leif Fontainep aamma iluarisimaarpaa.
- EU-mi politikkerit tusagassiutilerisullu puisip neqaa misilippaat. Mamarisorujussuuaat. Aamma Avaakkut takutitsinerat tusarnerineqarluarpoq, Leif Fontaine oqarpoq.
- Taamatut aaqqissueqqikkumaarpugut, nangilluni oqarpoq.
Europa-Parlamentip inoqqaariit puisinniartarnerannut atatillugu inatsisinik sukateriniarput pingasuni assigiinngitsuni. Puisip amianik tunisassiortarneq saqqumilaartinneqassaaq. Inatsimmut ajoqqutaasut iluaqutaasullu nalunaarutigineqartuaannassapput kiisalu aamma allaqqassaaq inoqqaariit inuit puisinniartarnerat pitsaasuusoq takutitassiarineqassalluni.