Inuit pisortallu aaqqissuussaannut malittarisassat nutaat
Naalakkersuisut aalajangersimapput, pisortat inuillu katersuutitsineri immikkoortinneqassasut, killersuutillu suut atuutsinneqassanersut.
Katerisimaartarnernut il.il. killilersuigallarneq pillugu nalunaarummut Naalakkersuisut naleqqussaarisimapput, pingasunngormat tusagassiorfinnut nalunaaruteqarnermi ilisimatitsissutigineqarpoq.
Pisortat aqqissuussaannut tunngasut:
Maanna kommunit killiisa atuuttut iluanni pisortat aaqqissugaannik killilersugaasumik sammisaqartitsisoqaqqusaalerpoq. Kommuninit allanit peqataasoqannginnissaata qulakkeernissaa imaluunniit kommuninit allanit peqataanissamut kaammattuisoqannginnissaata qulakkeernissaa aaqqissuussisut akisussaaffigaat.
Inuit aaqqissuussaannut tunngasut:
Inuit aaqqissuussaannut kommuninit allanit peqataasoqaqqusaavoq, assersuutigalugu kuisitsinermut, inuuissiortitsinermut, soraarummeernermi katittoqartilluguluunniit nalliuttorsiornernut, ilisiartoqataanermut assigisaanullu.
Peqataasut amerlassusaannut killilersuinerit suli atuuttut:
Illup iluani aaqqissuussani amerlanerpaamik inuit 100-t peqataaqqusaapput, tamatuma saniatigut inatsit inuit ininut isersinnaatitaasut amerlanerpaaffissaasa affaannaat isersimaqqusaanerannut tunngasoq malinneqassaaq.
Silami aaqqissuussani amerlanerpaamik inuit 250-it peqataaqqusaapput.
Naleqqussaanermi siunertarineqartut tassaapput aaqqissuussanik ingerlataqarsinnaanermut kissaatip piviusunngortinnissaa peqatigalugulu nappaatip siaruaannissaannut aarlerinassutsip minnerpaaffianiitinnissaa, ilisimatitsissutigineqarpoq.
Nalunaartut tamakkerlugu atuaruk, uani