Skip to main content

Inuit pisinnaatitaaffii: Immikkoortitsisarnermut illersuineq ukkatarineqartoq

Immikkoortitsisarnermut nalinginnaasumik illersuisussamik Kalaallit Nunaanni innuttaasunut tamanut atuuttussamik atuutsilersitsisoqartariaqarpoq. Inuit Pisinnaatitaaffiinut Institutti suleqatigalugu Inuit Pisinnaatitaaffii pillugit Siunnersuisoqatigiit FN-imut nalunaarusiaani innersuussutit ilaat taama nipeqarput.

- Kalaallit Nunaanni naligiissitaanermut inatsit maannakkut atuuttoq inunnik tamanik naammattumik illersuinngilaq.

Kalaallit Nunaanni Inuit Pisinnaatitaaffii pillugit Siunnersuisoqatigiit instituttilu uteqqiartumik nalunaarusiaminni, Danmarkimi Kalaallit Nunaannilu inuttut pisinnaatitaaffiit unammillernarfiunerpaasut pillugit institutip nassuiaataanik imaqartumi taama naliliipput, Inuit Pisinnaatitaaffii pillugit Siunnersuisoqatigiit tusagassiorfinnut nalunaarutaanni allassimavoq.

Maannakkut suliffeqarfinni angutit arnallu naligiissitaanissaat Kalaallit Nunaanni inatsimmit ikorfartorneqarpoq.

Suli killeqartut

- Kisianni Kalaallit Nunaanni Naligiissitaanermut Siunnersuisoqatigiit suli maannamut killeqarput, siunnersuisoqatigiit immikkoortitaanermut innuttaasunit suliakkiissutinut misissuisussaatitaanngimmata. Kalaallit Nunaanni innuttaasut immikkoortitaasutut misigisimasut attuumassuteqanngitsumik naammagittaalliornermi aalajangiisartunut naammagittaalliornissaminnut periarfissaqanngillat. Suliassalli eqqartuussivimmut saqqummiunneqassapput, nalunaarummi oqaatigineqarpoq.

Pisortat oqartussaasuinit assigiinngisitsinermik tunngasumik naammagittaalliuuteqartoqassappat, Inatsisartut Ombudsmandianut naammagittaalliortoqarsinnaavoq.

Inatsisit amigaateqartut

Kalaallit Nunaanni Inuit Pisinnaatitaaffii pillugit Siunnersuisoqatigiit instituttilu taamaattumik innersuussutigaat, inatsiseqarnissamut sulissuteqarnissamut paasisitsiniaasoqassasoq, immikkoortitsisarnermut nalinginnaasumik illersorneqarnissamik qulakkeeriinnittumik. Tamatuma saniatigut attuumassuteqanngitsumik naammagittaalliornermi aalajangiisartunik pilersitsisoqartariaqarpoq. 

- Kalaallit Nunaat ullumikkut innuttaasunik immikkoortitsisarnermut nalinginnaasumik illersuisussamik inatsiseqanngilaq. Suiaassuseq, inuiaassuseqarneq, innarluuteqarneq aamma atoqateqartarnikkut qanoq inissisimaneq pissutaallutik immikkoortitsisarnermut illersorneqarnissaq innuttaasut immikkoortinneqaratik toqqissisimasumik inuuneqarnissaannut qulakkeerinnnittussamik tunngavittut pisinnaatitaaffiuvoq, Kalaallit Nunaanni Inuit Pisinnaatitaaffii pillugit Siunnersuisoqatigiinni siulittaasoq Sara Olsvig oqarpoq. 

Sara Olsvig naapertorlugu, Inuit Pisinnaatitaaffii pillugit Siunnersuisoqatigiinnut taamaammat pingaaruteqarsimavoq ajornartorsiutip aamma inatsisitigut illersorneqarnissamik amigaateqarnerup aaqqiivigineqarnissaanut tigussaasumik innersuisoqarnissaa tikkuaqqinneqarnissaat.

Danmark nalilersorneqassasoq

Ukiut tallimakkaarlugit Danmarkip Kalaallit Nunaatalu inuit pisinnaatitaaffii malinneraat FN-ip Inuit Pisinnaatitaaffii pillugit Siunnersuisoqatigiivisa misissortassavaat. Naalagaaffiit Peqatigiit isumaqatigiissutaani tamakkiisumik suliniutit Danmarkip akuerisimasai Kalaallit Nunaannuttaaq atuuttut Nunarsuaq Tamakkerlugu Piffissani Killilinni Naliliinermik taaneqartartumi (tuluttut; Universal Periodic Review (UPR)) FN-ip nalilersortarpai.

Danmark aappaagu maajip qaammataani FN-imit nalilersorneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER