Inuit pisinnaatitaaffii pillugit siunnersuisoqatigiit politikkerinut oqariartuuteqartut

Kaalaallit Nunaanni Inui Pisinnaatitaaffii pillugit Siunnersuisoqatigiit suliassaminnik naammassiuminaatsitsippt, siunnersuisoqatigiinnit taamaammat aningaasaliissutit aappaagu qaffanneqassasut politikkerinut qinnuteqaatigaat.

- Inuit Pisinnaatitaaffii pillugit Siunnersuisoqatigiit eqqaasitsissutigerusuppaat, siunnersuisoqatigiinnut aningaasaliissutit qaffaaffigineqanngippata, Inatsisartut siunnersuisoqatigiit pillugit inatsisaanni siunertaasut siunnersuisoqatigiinnit naammassiuminaatsinneqarluinnassammata, siunnersuisoqatigiinni siulittaasoq Sara Olsvig Inatsisartuni ilaasortanut aamma Inatsisartut Aningaasaqarnermut Akileraartarnermut Ataatsimiititaliaanut ammasumik allagaqarluni allappoq.

Aningaasanut inatsisissatut sunnersuummi maannamuugallartoq siunnersuisoqatigiinnut 915.000 koruunit immikkoortinneqarsimapput.

Siunnersuisoqatigiit suliassaat:

Inuit Pisinnaatitaaffii pillugit Siunnersuisoqatigiit suliassaraat Kalaallit Nunaanni inuit pisinnaatitaaffiisa siuarsarneqarnissaat illersorneqarnissaallu, inuiaqatigiinni kalaallini inuit pisinnaatitaaffiisigut unamminartut oqallisiginerisigut aamma Inuttut pisinnaatitaaffinnut Institutti ingerlatassanik siunnersuuteqarfigineratigut, assersuutigalugit matumani ilanngullugit:

1) Kalaallit Nunaanni inuit pisinnaatitaaffiinut pissutsit pillugit nakkutilliinermut nalunaaruteqartarnermullu peqataanerit,

2) inuit pisinnaatitaaffiinut tunngassuteqartunik misissueqqissaarnerit ilisimatusarnikkullu suliat oqallisigineri,

3) inuit pisinnaatitaaffii pillugit Inatsisartunik, Naalakkersuisunik oqartussaasunillu allanik aamma namminersorlutik suliaqartunik siunnersuinerit,

4) inuit pisinnaatitaaffiinik inuiaqatigiinni sulianik ataqatigiissaarineq taakkununngalu naleqqiullugu ikiuunneq,

5) inuit pisinnaatitaaffiinik ilinniartitsinermik tapersersuineq siuarsaanerlu,

6) inuit pisinnaatitaaffii pillugit paasissutissanik siammarsaanermut peqataaneq,

7) Kalaallit Nunaanni inuit pisinnaatitaaffiisa patajaallisarneqarnissaat siunertaralugu ingerlatassanik siunnersuuteqarneq, aamma

8) Kalaallit Nunaanni inuit pisinnaatitaaffiinut tunngassuteqartunik maannamut suliaasarsimasut ingerlanerisa nalilersornerat.

Imm. 2. Inuit Pisinnaatitaaffii pillugit Siunnersuisoqatigiit Inuttut pisinnaatitaaffinnut Instituttip siulersuisuinut ilaasortassamik toqqaassapput.

Sulisussanik pissarsiniarneq ajornartartoq

Siunnersuisoqatigiit assersuutigalugu allapput, sulisussanik pissarsiniartarneq ajornangaatsiartartoq:

- Sulisussanik patajaattunik pissarsiniarneq ajornarsimavoq, pingaartumik aningaasaliissutaasartut annertussusaat pissutigalugit allattoqarfimmi pisortassamik pisortatut iluamik aningaasarsiaqartinneqartussamik siunnersuisoqatigiit atorfinitsitsisinnaasimanngillat.

Siunnersuisoqatigiilli inatsisitigut pisussaaffik malillugu 2020-mi ataatsimiittarsimapput, aamma siunnersuisoqatigiit FN-mut nalunaarutinik pinasunik nassiussisimapput kiisalu killiffiit pillugit nalunaarusianik pingasunik suliaqarsimallutik, taakkunannga ataaseq tamanut saqqummiunneqarsimalluni.

- Siunnersuisoqatigiit tamatumunnga peqatigitillugu Namminersorlutik Oqartussat ukiup ingerlanerani tusarniaassutaannut arlalinnut aamma aaqqissuussarpassuarnut peqataasarsimapput, siulittaasoq allappoq.