Inuit Pisinnaatitaaffii pillugit Siunnersuisoqatigiit nutaamik siulittaasortaarput

Ullumi inuit pisinnaatitaaffii pillugit siunnersuisoqatigiit ukiumoortumik ataatsimeersuarput, ataatsimeersuarnermi arfinillit nutaat siunnersuisooqatigiinni ilaasortaalerput siulittaasorlu nutaaq aamma sulilertussanngorluni.

Sara Olsvigip inuit pisinnaatitaaffii pillugit siunnersuisooqatigiinni ullumi siulittaasuuffia kingulleq. Ataatsimeersuarnermi arfinillit nutaat ilaasortanngorput taassumallu saniatigut ukiuni marlunni siulittaasuuffiusumi nutaamik siulittaasortaartoqarpoq.

Sara Olsvig immikkut ataatsimik nuannaarutissaqarpoq. Aningaasaqarnermut inatsit 2022-mi siunnersuisooqatigiinnut pingajorarterutaanik aningaasaliisoqarpoq.

- Ukiuni marlunni siulittaasuusimasutut naammassininni, Inuit Pisinnaatitaaffii pillugit Siunnersuisoqatigiit allatseqarfiannut aningaasaliissutit qaffangaatsiarneqarnerat assut nuannaarutigaara. Tamanna siulittaasoqatigiinngorumaartut sulineranni allatseqarnikkut aalajaatsumik kiffartuunneqarsinnaanerisa qulakkeerneqartussanngorneranik kinguneqassaaq, Sara Olsvig oqarpoq.

Namminneq kajumissutsiminni sulisut atorneqartut

Inuit Pisinnaatitaaffii Pillugit Siunersuisooqatigiit ukiumut 915.000 koruuninik aningaasaliiffigineqartarsimavoq. Maannalu 2,4 millionit koruuninik aningaasaliiffigineqartartussanngorluni.

- Ukiuni kingullerni marlunni inuit pisinnaatitaaffii pillugit suliat pitsaaqisut, Siunnersuisoqatigiinni nammineq kajumissutsimik nukinnik atuisoqarneratigut kivissinnaasimavagut. Minnerunngitsumik Inuit Pisinnaatitaaffiinut Institutti, ICC, kingullertullu Ilisimatusarfik, taakkulu saniatigut MIO, Tilioq, Naligiissitaanermullu Siunnersuisoqatigiit Siunnersuisoqatigiinni ataavartumik ilaasortaasut qanimut suleqatigisimavagut, siulittaasutut naammassisussaq nassuiaavoq.

Sara Olsvig Inuit Pisinnaatitaaffiini Siunersuisooqatigiinni siulittaasuunermini ilaatigut nalunaarusiat marluk, tassa ineqarnissamut pisinnaatitaaffeqarneq aamma ilinniagaqarnissamut pisinnaatitaaffeqarneq saqqummersinnikuuai. Taassuma saniatigut covid-19-imut atatillugu nalunaarutit pillugit Naalakkersuisunut Inatsisartunullu tusaniaarnerni akissuteqaasiornerit allakkiaqarnerillu, saqqummiisinerit oqallinnerillu aammalu arnanut persuttaasarneq ukkatarineqarnerulernissaa suliarineqartarsimapput.

Aningaasaliineruneq

Inatsisartut Aningaasanut Inatsisaanni aningaasaliissutit qaffanneqarnerisa saniatigut “Kalaallit Nunaanni inuit pisinnaatitaaffiinik ilisimanninnerup nukittorsarneqarnissaanut attanneqarnissaanullu” ukiut tamaasa 750.000 koruunit Danmarkimi Inuit Pisinnaatitaaffiinut Institutti Folketingimit aningaasaliiffigineqarpoq.

Siunnersuisooqatigiit ukiumut katillugit 3,2 millionit koruuninik ukiuni aggersuni aningaasaliiffigineqartassaaq.

Powered by Labrador CMS