Inuit Pisinnaatitaaffii pillugit Siunnersuisoqatigiit FN-imut saqqummiussisimapput

Inuit Pisinnaatitaaffii pillugit Siunnersuisoqatigiit ukiut tallimakkuutaarlugit Naalagaaffiit Peqatigiit Arnat pillugit Ataatsimiititaliarsuanut saqqummiussisarput. Siunnersuisoqatigiit saqqummiussigaangamik nunami unammilligassat annerit ataatsimiititaliamut saqqummiuttarpaat, saqqummiussallu tunngavigalugit Naalagaaffiit Peqatigiit ilaatigut Naalakkersuisunut suut pitsanngorsagassaanersut pillugit tigussaasunik inassuteqaateqartarput.

Naligiissitaanissamut Siunnersuisoqatigiit siulittaasuat Kathrine Bødker Kalaallit Nunaanni Inuit Pisinnaatitaaffii pillugit Siunnersuisoqatigiit sinnerlugit oqaaseqarsimavoq.

Oqaaseqarnermini ilaatigut nunami maanni ajornartorsiutitut suli unammilligassaasut saqqummiussimavai.

2019-imi innuttaasunit 1000-iusunit 17-it persuttarneqarsimapput (suiaassusaannut agguataarnagit)

Nalunaarusiaq 2010-meersoq naapertorlugu Kalaallit Nunaanni arnat tamarmiusut 62 procentii persuttarneqarsimapput imaluuunniit persuttarneqarnissamik sioorasaarneqarsimapput

Nunami meeqqat 28 procentiisa angerlarsimaffimmi persuttaasoqartarnera misigisarpaat

15-iniit 29-nut ukiullit 24 procentiisa suli 18-inik ukioqalertigatik kinguaassiuutitigut atornerlunneqarneq imaluunniit atornerlunneqarniartarneq misigisimavaat.

- Arnat angutillu ataqqinartut. Nunagisanni niviarsiaqqat pingasuugaangata ataaseq aamma nukappiaqqat quliugaangata ataaseq kingussiuutitigut atornerlunneqartarput. Arnat meeqqallu pisiginnaatitaaffiinik unioqqutitsisoqartarpoq, Kathrine Bødker ilaatigut oqarpoq.

Katrine Bødkerip oqaaseqarnermini aamma Naalakkersuisunut kaammattuutigaa, kinguaassiuutitigut atornerluisarneq akiorniarlugu periusissiaminnut pinaveersaartitsineq, ilinniartitaaneq aamma inuiaqatigiinni inulerisut tamarmik peqataatinneqarnissaat kiisalu inuit innarluutillit peqataatinneqarnissaat ilanngutissagaat.

Isiginiarneqarnerulersimasoq

Inuit Pisinnaatitaaffii pillugit Siunnersuisoqatigiinni siulittaasup Sara Olsvigip Sermitsiaq.AG-mut oqaatigaa, nikanarsaalluni tiinganiartarneq kinguaassiuutitigullu kannguttaatsuliortarneq Kalaallit Nunaanni isiginiarneqarnerulersimasoq.

- Inuit Pisinnaatitaaffii pillugit Siunnersuisoqatiginnit inassutigaarput siammasinnerusumik suliniuteqartoqassasoq, arnanut taamatut iliuuseqartarnerup immikkoortitsisuunera kikkut tamarmik ilisimalerniassammassuk.

- Kalaallit Nunaanni arnat immikkoortitaasarneri suli annertupput. Arnanik persuttaasarnerit amiilaarnartumik annertupput, soorlu arnat meeqqallu Kalaallit Nunaanni pisinnaatitaaffiinut atatillugu niviarsiaqqanik kinguaassiutitigut atornerluisarnerit unammilligassat annersaasut ilagingaat, Sara Olsvig oqarpoq.

Kathrine Bødkerip Sermitsiaq.AG-mut erseqqissaatigaa, akiuiniarneq tamanna arnat kisimik akiorniagassarinngikkaat.

- Meeqqanik arnanillu atornerluisarnerup immikkoortitsisarnerullu akiorniarneqarnerannut arnat angutillut tamaasa pisariqartippavut. Arnat ataqqiniarlugit, timivut ataqqinassuserpullu ataqqiniarlugit, taanna oqarpoq.