Kalaallit Nunaanni inuit pisinnaatitaaffii pillugit pingaarutilimmik ilisimasaqarnissaq pillugu angalaneq sapaatip-akunnerata tulliani aallartissaaq.

2022-imi qulequtaq taanna qulequtaralugu, Sisimiuni GUX-imi ilinniartut ”apeqqutit oqaluuserisassat” qulequtsiullugu misiligutaasumik suleqatigiissuteqarnermi (workshop) sammisaqartinneqarneranni, Siunnersuisoqatigiit aamma Sisimiuniipput. Ilinniartut isummersuutaat misilittagaallu pingaarutillit atorlugit, Siunnersuisoqatigiit inuit pisinnaatitaaffii pillugit apeqqutit oqaluuserisassat inerisaqqippaat, taakkorpiaappullu angalanissani tunngaviusut. Taakku tusagassiuutinut nalunaarummi allapput.

Isummersuutit inuit pisinnaatitaaffii pillugit apeqqutit oqaluuserisassallu pitsanngorsarneqarnerannik kinguneqarput, taakkulu angalanermi tunngavigineqassapput.

Inuit pisinnaatitaaffiinik oqaluuserinninnissamut, apeqqutinik oqaluuserisassanik suleqatigiissuteqarnerni peqataasut akornanni ilisimasat, soqutiginninnerup piginnaasallu malunnaatilimmik annertusinerat, naliliinerup takutikkaa, suliniummik aqutsisoq Kristina Kristensen oqarpoq.

- Innuttaasummi inuit pisinnaatitaaffiinik soqutiginartumik naapertuuttumillu oqaluuserinnissinnaanissamut piginnaanngorsarnissaat suliniummi siunertaavoq. Taamaammat suleqatigiissuteqartitsinitta (wokshop) Kalaallit Nunaanni innuttaasunut amerlanernut siammarternissaannut maanna piareernerput nuannaarutigeqaarput.

Nunatsinni angalaqqissasut

Suleqatigiissitsinissat Ilulissani Perorsaanermik Ilinniarfimmi Sisimiunilu GUX-imi ingerlanneqassapput.

Suliniut Atlantikup Avannaamiuinut Aningaasaliissutinit aningaasaliiffigisanut – danskit aningaasaqarnermut inatsisaanni immikkut aningaasaliissutinut- ilaavoq. Tamatumunnga atatillugu Siunnersuisoqatigiit, Danmarkimi Inuttut Pisinnaatitaaffinnut Institutti peqatigalugu, 2024-ip naanissaanut, kalaallit innuttaasut akornanni inuit pisinnaatitaaffii pillugit ilisimasanik nukittorsaanissamut iliuusissanik assigiinngitsunik inerisaanissamik suliniuteqarput.

Sap. ak. tulliani angalanissaq Kalaallit Nunaat tamakkerlugu angalanissamut aallarniutaavoq. Oktobarimi Siunnersuisoqatigiit Instituttilu- ilaatigut Aasianni suleqatigiissuteqartitsissapput (workshop), taamatuttaaq Kujataa Tunulu 2024-imi upernaakkut tikinniakkat ilagalugit.

Pisinnaatitaaffiit pillugit sorsuuteqarneq pillugu filmiliaq

Aaju Peter aamma angalaqataassaaq. Taanna arnaavoq inatsisileritooq, inuit pisinnaatitaaffiinik sorsuutiginnittoq filmimilu ”Twice Colonized” pingaarnertut inuttaasoq. Filmimi Aajup inuttut oqaluttuassartaa inuuninilu tamaat issittumi Inuit pisinnaatitaafiisa nukittorsarneqarnissaannik sorsuutiginninnera takutinneqarpoq. Filmi Kalaallit Nunaanni takuteqaarneqarpoq Nuuk International Film Festivalimi septembarip ulluisa 13-ianni kingornalu Nuummi, Sisimiuni Ilulissanilu takutinneqassalluni.

Immikkorluinnaq ittumik, suleqatigiissuteqarnernut atatillugu filmip ”Twice Colonized” takutissinnaanera peqataasunullu Aajumut apeqquteqarsinnaallunilu akissuteqarfigineqarnissamut neqeroorsinnaaneq, Siunnersuisoqatigiit Instituttillu tulluusimaarutigaat. Suleqatigiissutigisat ’Twice Colonized’ -ilu aallaavigalugit, nunap inoqqaavisa pisinnaatitaaffii, immikkoortitsisarneq Kalaallit Nunaatalu Danmarkillu akornanni pissutsit pillugit oqaloqatigiinnermik pingaarutilimmik ammaanissaq aaqqissuisunit kissaatigineqarpoq.

Filmi ”Twice Colonized” tamanut takutinneqassaaq Ilulissani septembarip ulluisa 17-ianni 18-iannilu Sisimiunilu septemberip ulluisa 19-ianni 20-iannilu. Nuummi filmi Katuami takutinneqassaaq septembarip ulluisa 19-ianniit 26-iannut.