Inuit pinngortitamut isiginnittariaasiat
Pinngortitamiikkaangavit suna eqqissisimanarisarpiuk? Ilisimasassarsiorneq piujuaannartitsineq tunngavigalugu ineriartornermik patajaallisaasussaq Nuummi aallartinneqassaaq. Nunani Avannarlerni KulturikkutIlisimasassarsiornermi Kalaallit Nunaannit, Norgep avannaannit Danmarkimillu oqaluttuat katersorneqassapput.
Nalinginnaasuunngitsumik ilisimasassarsiornermi anguniarneqarpoq, inuit pinngortitamut atatillugu isiginneriaasiannik ilisimasaqalernissaq. Tassa pinngortitamik
avatangiiserisatsinnik inuunitsinnut pingaaruteqartut imaluunniit pingaaruteqarsimasut pillugit inuit namminneq oqaluttuaannik nutaanik ilisimasassarsiortoqarniarpoq. Ilisimasassarsiorneq pinngortitap inunnut qanoq sunniuteqartarnera pillugu nutaanik paasisaqarnissamut atorneqassaaq.
Oqaluttuat septembarip 18-ani workshoppertitsinermi katersorneqassapu, tassani peqataasut apersorneqassallutik. Workshoppertitsinermi oqaluttuat toqqarneqarsimasut 2021-mi septembarip 23-ani Nuummi kulturikkut illorsuarmi Katuami NAPA suleqatiglugu saqqummiunneqassapput.
Ilisimasassarsiornissaq pillugu paasisaqarnerorusukkuit aamma misigisimasannik allanut avitseqateqarusukkuit juunip qulingani nal. 17:30 internetsikkut naapittarfimmut iserlutit peqataasinnaavutit.
Ilisimasassarsiornissaq Nordic Nature Narratives Facebookiani paasisaqarfiginerusinnaavat.
Oqaluttuat allannguisinnaasut
Pinngortitaq ilinnut qanoq isumaqarpa? Sumiiffiit alliartorfigisimasat imaluunniit allamut nuulluni qimassimasat oqaluttuarineqarsinnaapput. Aamma sumiiffik eqqissisimanarisaq oqaluttuarineqarsinnaavoq. Pinngortitami sumiiffik ilinnut aalajangiisuulluinnartumik allatulluunniit misigisaqarfigisimasat.
- Oqaluttuat tamarmik qujarunnassaqaat. Misigisat angisuut mikisulluunniit.
Oqaluttuat ”storytelling workshop”-peqartitsinermi Nuummi septembarip 18-iani pisussami katersorneqassapput, tassanilu immiunneqarlutik. Nuummi workshoppertisinermi peqataasussarsiorpugut qassinilluunniit ukiulinnik. Oqaluttuat kingusinnerusukkut oqaluttuaatigaluni isiginnaagassiani aamma tusarnaagassiani (podcast)
avitseqatigiissutigineqassapput naggataagullu atuakkatut Kalaallit Nunaanni, Norgep Avannaani Danmarkimilu inuit pinngortitamik isiginninnerannik imaqartussami saqqummissallutik, Eva Ritter ilisimasassarsiornermik aqutsisut ilaat allappoq.
Taanna Jens Larsenimik suleqateqarluni oqaluttuanik katersiniarpoq. Larsen, storytelling atorlugu oqaluttuariaatsinik ilisimatusartuuvoq aamma arlalinnik oqaluttuartitsinernik suliniuteqartarsimavoq.
Silap pissusaa avatangiisillu
Ilisimasassarsiorneq pinngortitap uagutsinut qanoq sunniuteqartarneranik nutaanik
paasinnilersitsissaaq. Suliniut Nunani Avannarlerni pisuussutinik piujuaannartitsineq
tunngavigalugu suliniutinut ilapittuutaassaaq, pingaartumik Naalagaaffiit Peqatigiit nunarsuaq tamakkerlugu anguniagassatut siunniussaannut, silap pissusaa avatangiisillu. Eva Ritter Kalaallit Nunaanni aallaaveqartumik piujuaannartitsinermik tunngaveqarluni ilinniarnermik suliniuteqarsimavoq. Piujuaannartitsinermik tunngaveqarluni isiginneriaatsit arlallit atorlugit sulinissap qanoq pingaaruteqartiginera tassani ilikkarsimavaa.
- Amerlanertigummi piujuaannartitsinermik tunngaveqarnerup isumaa nunat killiit inuisa isiginneriaasiat kisiat atorlugu saqqummiunneqartarpoq. Ilisimasassarsiornitsinni ilaatigut Kalaallit Nunaanni, Norgep Avannaani aamma Danmarkimi oqaluttuariaatsinik imaqartussami paaserusutarput tassaavoq Nunani Avannarlerni kulturikkut assigiinngisitaarneq nassaassaasoq qanoq ilinniarfigisinnaaneripput, Eva Ritter oqarpoq.