Inuit pingasut umiatsiaaqqamiittut kilisaammit annaanneqartut
Inuit pingasut umiatsiaaqqamik angalatillutik sarpiat sikumit aserorneqarmat Aasiaat radiuatigut ataasinngormat ikiortissarsiorsimapput. Kilisaat Svend C sumiiffigisaasa eqqaaniisimavoq, inuillu pingasut taakku annaassimallugit.
Politiit ataasinngormat ullaakkut nalunaaqutaq 05.55 nalunaarfigineqarsimapput, inuit pingasut Sisimiut Aasiaallu akornanni umiatsiaaqqami matoqqasumiillutik ikiorneqartariaqalersimasut.
Sikumut aporamik sarpiat aserorsimavoq, imaata sarfaa pissutaalluni nunamut anngussinnaasimanngillat. Politiit pigaartuisa pisortaat Julie Senderovitz Bendtsen Sermitsiaq.AG-mut ilisimatitsivoq.
Politiit Issittumi Sakkutooqarfik Aasiaallu radiuat suleqatigalugit annaassiniarneq aallartissimavaat, tamannalu ajunngitsumik inerneqarsimavoq.
Radioqarsimanerat iluaqutaasoq
Issittumi Sakkutooqarfiup umiarsuaq alapernaarsuut Ejnar Mikkelsen aallartissimavaa, Sikuaq Trawlilli kilisaataataa Svend C siulliulluni apuussimavoq, inuillu pingasut pineqartut nunamut anngussinnaasimallugit.
Pigaartut pisortaata erseqqissaatigaa, inuit taakku pingasut umiatsiaaqqaminni qujanartumik VHF radioqarnerat pissutigalugu annaassiniarneq ajunngitsumik inerneqarsimasoq.
- Politiit, Issittumi Sakkutooqarfik Aasiaallu radiuat suleqatigiilluarsimapput, taamaalilluta kikkut qaninnerpaanersut paasisinnaasimavarput, taamalu inuit taakku pingasut annaassinnaasimallutigit, Julie Senderovitz Bendtsen oqarpoq.