Inuit pingasut itinngitsoorlutik toqungajassimasut

Inuit pingasut siorna aalisariummi Falkenimi Qeqertarsuatsiaani taleqqasumi juulip 22-ani nal. 21.00 missaani ilisimajunnaaqqasut nassaarineqartut itinngitsoorlutik toqungajassimapput.

Aalisariutip naalagaata Dronning Ingridip Napparsimmavissua Nuummiittoq attaveqarfigaa, tassanngalu inuit ajoqusersimasut taakkua qulimiguulimmik napparsimmavissualiaatitinneqarlutik. Taakkua ilaat ataaseq pisup paasineqarneraniit nal. ak. arfinillit ingerlareersullu napparsimmavissuarmut apuunneqarnermi kingorna aatsaat ilisimmarpoq. Inuit ajoqusersimasut taakkua kuliltimik sakkortuumik toqunartunissimanertik pissutigalugu suliarineqassallutik unitsinneqarput. Ajoqusersimasut ilaasa marluk qaratsamikkut ajoquteqalersimanissaat ernummatigineqaleraluarpoq, arlaannaalluunniilli ataavartussamik ajoquserani.

Taama pisumik nassuiaasiortoq Den Maritime Havarikommission allappoq.

Ajutoorneq pivoq aalisariut aalisarnermi nalaani innaallagiaaruttoormat angallammillu allamit kalinneqarluni Qeqertarsuatsiaaliaanneqarmat, tassanilu talilluni. Usingiartoqareermat angallatip naalagaa innaallagissiuummik angallattakkamik benziinatortumik 2,2 kW-mik atorpoq, batteriit sarfalersorneqarsinnaaqqullugit.

Inuit issimasut ilaat marluk aalisariutip siuata initaani aquttarfiup ataaniittumi sininnialerput, ilaasorlu 13-inik ukiulik nerisassiulerluni. Nerisassiai akunnerup ataatsip missaa ingerlareersorlu naammasseqqajaalermata inuttat sinittut tamatuminnga ilisimatippai. Tamatumalu kinguninngua ilisimajunnaarluni.

Inuit taakkua pingasut innaallagissiuutip benziinatortup gassimik aniatitaanit kuliltimik sualuttumik toqunartoqalerput. Innaallagissiuut benzinatortoq angallatip akkumulatorii sarfalersorniarlugit qaavata ataanut inissinneqarsimavoq.

Nassuiaat kalaallisut atuarneqarsinnaavoq UANI
Qallunaatt atuarneqarsinnaavoq UANI