Inuit nalunaarsorsimaffiannik pilersitsinissamik siunnersuut Inatsisartuni sisamanngornermi siullermeerlugu suliarineqarmat, ilimagineqarsimasutut annertuumik oqallisigineqarpoq.

Naleqqami siulittaasoq Pele Brobergi siunnersuuteqartuusimavoq, taassumalu arlaleriarluni siunnersuut oqaluuserisassanut ilannguteqqusarsimavaa, apeqqutigisarlugu: kalaallit inuiaat kikkuuppat?

- Ajornanngitsumik inuk tikkuarlugu oqarsinnaavugut: una danskiuvoq, uagulli nammineq kikkuunerluta naluarput, Pele Brober oqallittoqarnerani oqarpoq.

Siunnersuut pineqartoq naatsumik oqaatigalugu tassaavoq, Kalaallit Nunaanni inuit nalunaarsorsimaffiannik pilersitsisoqarnissaa, tamannalu samit aaqqissuussaat isumassarsiorfigalugu pissasoq. Norgemi samit nalunaarsorsimaffeqarput, samit namminneq kajumissusertik atorlugu nalunaarsorneqarsinnaapput aamma oqaatsit aalajangersimasut kikkunnillu kingoqqisuunissaq pillugit piumasaqaatinik naammassinnissimasussaapput. Nalunaarsorsimaffik malillugu Sametingimut qinersisoqarsinnaavoq.

Inatsisartunut qinersinermi namminersulivinnissarlu pillugu apeqqutinut atorneqarsinnaasoq

Pele Brobergip siunnersuummini nalunaarsorsimaffik sumut qinersinermut atorneqarsinnaanersoq erseqqissaassutigisimanngilaa, tamannalu oqallittoqarnerani sammineqarluarluni.

Kalaallit Nunaata namminersulivinnissaa pillugu siunissami danskit qinersisinnaatitaassanersut arlaleriarluni apeqqutigineqarpoq.

Pele Brobergip tassunga atatillugu oqaatigaa, nalunaarsorsimaffik taamatut inissisimasoqarnerani atorneqarsinnaanersoq pillugu apeqqut ataatsimiititaliami suliarineqartariaqartoq. 

Pele Brobergip Sermitsiaq.AG-mut itisiliilluni oqaatigaa, Namminersorneq pillugu inatsimmi isumaliutissiissut naapertorlugu, Inatsisartunut qinersisoqartarneratuulli namminersulivinnissaq pillugu innuttaasut taasitinneqarnissaat naatsorsuutigineqartoq.

Pele: Norgemiut Spaniamiullu aamma taasisinnaanngillat

- Inuilli ullumikkut pisinnaatitaaffiisa qulakkeerneqarnissaat pingaaruteqarnerpaavoq, nalunaarsorsimaffik aqqutigalugu Danmarkimi nunanilu tamalaani inatsisit naapertorlugit EU-p Inuit ilaatinneqannginnissaannik pisinnaatitaaffiinillu maleruaqqusaanik malinnittoqarnissaa qulakkeerinnittoqassaaq, Pele Broberg oqarpoq.

Pele Brobergip ilanngullugu oqaatigaa, kalaallit danskisut kinaassutsinnik tigumminniinnarusuttut aaqqissuussaq aqqutigalugu nalunaarsorsimaffimmut ilanngunneqarsinnaanertik namminneq kiffaanngissusertik atorlugu aalajangissagaat.

- Inuit taamaalillutik siunissartik namminneq aalajangiiffigisinnaalissavaat, aamma danskit Kalaallit Nunaanni najugaqartut nuussimasut allat assigalugit pisinnaatitaaffeqassapput, Pele Broberg oqarpoq, nangillunilu:

- Norskit, Spaniamut allallu aamma Inatsisartunut qinersisinnaatitaanngillat. Danmarkimi aamma inuit Danmarkip naalagaaffiani innuttaassuseqartut kisimik folketingimut qinersisinnaatitaapput. Periarfissaq alla tassaavoq, inuit kinaassutsiminnik tunutsisinnaanerat, Pele Broberg Sermitsiaq.AG-mut oqarpoq.

Naalagaaffimmi innuttaassuseqartitsilernissamut ammasoq

Naleqqamit siunnersuut malillugu nalunaarsorsimaffeqartoqalissappat, Danmarkip naalagaaffiani danskisut innuttaassusillit arlallit Inatsisartunut qinersisinnaajunnaassapput.

Brobergip erseqqissaassutigaa, Naleqqamit ammaffigineqartoq, assersuutigalugu namminiilivissimanerup kingorna Danmarkip naalagaaffiani innuttaassuseqartut Inatsisartunut qinersisinnaatitaalersinnaanerat.

IA-p oqaaseqartartua Agathe Fontain siunnersuummut isumaqataavallaanngilaq, oqaaseqartartutullu saqqummiinermini oqaatigaa, Naalakkersuisut allannguutissatut siunnersuutaat IA-mit tapersersorneqartoq. Allannguutissatut siunnersuut malillugu nalunaarsorsimaffimmik pilersitsinerup kinguneqaatigisinnaasaanik pilersitsisoqarnissaanillu pisariaqartitsisoqarnersoq Naalakkersuisunit misissuiffigineqaqqaarniartoq.

- Nalunaarsorsimaffip taamatut ittup sumut atorneqarsinnaanera IA_mit apeqquserparput. Inuit 500-uinnaat nalunaassappatta, taava taanna sumut atussagami?

Fontain: Inunnik assigiinngissitsilissaaq

- Siunnersuut inunnik assigiinngissitsiliinnartussaavoq allaffissornerulernermillu nassataqassaluni, tamannalu pissutigalugu isumassarsialatsiaasorinngilarput, Agathe Fontain ilaatigut oqarpoq.

Atassummi siulittaasup Aqqalu Jerimiassenip siunnersuutip inunnik assigiinngissitsilersinnaanera mianersoqqutigaa:

- Matumani pineqarpoq aalajangersimasumik amertigut qalipaatillit allaninngarnit pisinnaatitaaffeqarnerulersinneqarnissaat, tamannalu isumaqatiginngilara. Ullut arlaanni Kalaallit Nunaata namminersulivinnissaa taasissutigineqassappat, neriuutigaara nalunaarsorsimaffeqassanngitsugut. Maani najugaqaraanni qinersisinnaatitaaffeqartussaavoq, Jerimiassen malittarisassanik atuuttunik innersuussisoq oqarpoq.

Partiit amerlanerussuteqartut Pele Brobergip siunnersuutaata aappaagu upernaakkut aappassaanik suliarineqannginnerani Inatsisinut Ataatsimiititaliami suliarineqarnissaa taperserpaat.