Inuit marluk imigassartorsimallutik angalasimasutut tigusarineqartut
Inuit marluk arfininngormat unnukkut Maniitsumi tigusarineqarsimapput, alkometer atorlugu misissorneqarmata paasineqarsimammat killissarititaasut sinnerlugit imigassartorsimasut.
Annonce
Kalaallit Nunaanni Politiit arfininngormat unnukkut arfineq-marlunngulersoq ilisimatinneqarsimapput, inuit aalakoorlutik Kangaamiuniit Maniitsumut angallammik ingerlaartut.
Umiatsiaq Maniitsumut tikimmat politiit talittarfimmi piareeqqasimapput.
Pineqartut marluullutik alkometeri atorlugu misissorneqarmata, killissarititaasoq sinnerlugu imigassartorsimasut paasineqarpoq, Kalaallit Nunaanni Politiit pigaartuisa pisortaat Julie Senderovitz Bendtsen ilisimatitsivoq.
Pineqartut marluullutik taamaammat tigusarineqarput aaversikkiartortinneqarlutillu.
- Taakku marluullutik iperagaaqqereerput, umiatsiamulli matuersaataat politiinit tiguneqarsimavoq, piginnittut aalakoorunnaarunik aasinnaanngoqqissavaat, Julie Senderovitz Bendtsen oqaluttuarpoq.