Inuit marluk 7,7 mio. koruunit pillugit suliami tigusarineqartut

Kalaallit Nunaanni Politiit Aalborgimiittumi Grønlnadshavnimi qerisut akornanni 7,7 millioner koruuninik nassaarsimaneq pillugu suliami inuit marluk tigusaralugillu unnerluutigisimavaat. Politiilli unnerluutiginninneq qanoq imaqarnersoq ilisimatitsissutigisinnaannginnerarpaat.

Danmarkimi Toldstyrelseimit pingasunngormat ilisimatitsissutigineqarpoq, Aalborgimiittumi Grønlandshavnimi qerisut akornanni 7,7 millioner koruunit oktobarip qaammataa qiteqquttoq nassaarineqarsimasut.

Poortukkat Kalaallit Nunaannit suminngaanneernersut pingasunngormat ilisimatitsissutigineqarusunngillat, suliarli Kalaallit Nunaanni Politiinut suliassanngortinneqarsimavoq, maannalu inuit marluk suliamut atatillugu tigusarineqareersimapput.

Misissuisoqarnerani aqutsisimasoq vicepolitiinspektøriusorlu Jan Lambertsen Sermitsiaq.AG-mut taamatut ilisimatitsivoq.

Politiit misissuisoqarnera pissutigalugu tigusarineqartut arnaanersut angutaanersulluunniit qanorlu ukioqarnersut imaluunniit qanoq unnerluutigineqarnersut ilisimatitsissutigisinnaannginnerarpaat.

Ifølge Sermitsiaq.AG-p paasisimasai naapertorlugit minnerpaamik inuk ataaseq kujataaneersoq matumani pineqarpoq.

Unnerluutigineqartut inatsisit tunngaviusut naapertorlugit matoqqasumik killisiorneqarsimapput.

Aningaasat toqqorluarneqarsimasut

Toldstyrelsenimit ilisimatitsissutigineqarsimavoq, miliuunerpassuit qerisutut nassiussat akornannut toqqorluarneqarsimasut.

- Poortukkat sinaanni takusassaqanngilaq, akitsuuserisulli skannerinerigamik qimmillu aningaasanik naamasaqarsinnaasut misissuitikkamikkit aningaasarpassuit nassaarisimavaat, tamatumalu kingornatigut politiit ilisimatinneqarsimallutik, Toldstyrelsenimi nakkutilliisut pisortaat Michael Lund ”nakkutilliiisut suliaqarluarsimanerannik" nersualaarinnittoq oqarpoq.

Aningaasat suminngaanneernersut qanorlu pinerluuteqartoqarsimanersoq politiit maannakkorpiaq oqaluttuarisinnaannginnerarpaat.

Powered by Labrador CMS